തെന്നിന്ത്യൻ താരങ്ങളായ നാഗ ചൈതന്യയുടെയും ശോഭിത ധൂലിപാലയുടെയും വിവാഹം ഡിസംബറിലാണ് നടക്കുക. ഹൈദരാബാദിലെ അന്നപൂർണ സ്റ്റുഡിയോയിലെ മുത്തച്ഛൻ അക്കിനേനി നാഗേശ്വര റാവുവിന്റെ പ്രതിമയ്ക്ക് മുന്നിൽ വച്ചാകും വിവാഹം. വിവാഹ ഒരുക്കങ്ങൾ നേരത്തെ തന്നെ ആരംഭിച്ചിരുന്നു. ഇപ്പോൾ ശ്രദ്ധനേടുന്നത് ശോഭിതയേക്കുറിച്ചും വിവാഹ ഒരുക്കങ്ങളേക്കുറിച്ചുമുള്ള നാഗ ചൈതന്യയുടെ വാക്കുകളാണ്.

ശോഭിതയുമായി ആഴത്തിലുള്ള ബന്ധമാണ് തനിക്കുള്ളത് എന്നാണ് നാഗ ചൈതന്യ പറയിക്കുന്നത്. ശോഭിതയ്‌ക്കൊപ്പം പുതിയ യാത്ര തുടങ്ങാനും ഒന്നിച്ചുള്ള ജീവിതം ആഘോഷമാക്കാനും കാത്തിരിക്കുകയാണ് താനെന്നും തങ്ങൾ തമ്മിലുള്ള ബന്ധം വളരെ ആഴത്തിലുള്ളതാണ് എന്നും നടൻ പറയുന്നു. അവൾ എന്നെ വളരെ മനോഹരമായാണ് മനസിലാക്കിയത്. എന്നിലെ ശൂന്യത അവൾ നീക്കി. ഇത് മനോഹരമായ യാത്രയായിരിക്കും.- നാഗ ചൈതന്യ പറഞ്ഞു.

വിവാഹത്തിനായി വളരെ ആവേശത്തോടെയാണ് കാത്തിരിക്കുന്നതെന്നും താരം പറഞ്ഞു. അന്നപൂർണ സ്റ്റുഡിയോ ഞങ്ങളോട് വളരെ ചേർന്നു നിൽക്കുന്നതാണ്. മുത്തച്ഛന്റെ പ്രതിമയ്ക്ക് മുന്നിൽ വച്ച് വിവാഹം നടത്തുക എന്നതും അനുഗ്രഹം വാങ്ങുക എന്നതും കുടുംബം നേരത്തെ ആലോചിച്ച് തീരുമാനിച്ചതാണ്. ഞങ്ങളുടെ കുടുംബങ്ങൾ ഒന്നിച്ച് ആഘോഷിക്കാനായി കാത്തിരിക്കുകയാണ്.- നാഗചൈതന്യ പറഞ്ഞു. ഡിസംബർ നാലിന് വിവാഹം നടക്കുമെന്നാണ് തെലുങ്ക് മാധ്യമങ്ങൾ റിപ്പോർട്ട് ചെയ്യുന്നത്.