മമ്മൂട്ടി - ജോണി ആന്റണി കൂട്ടുകെട്ടിൽ ഇറങ്ങിയ തോപ്പിൽ ജോപ്പൻ കുതിച്ച് കയറുകയാണ്. കുടുംബ പ്രേക്ഷക‌ർ ഇരുകയ്യും നീട്ടി സ്വീകരിച്ചിരിക്കുകയാണ് ജോപ്പനെ. മികച്ച അഭിപ്രായമാണ് ഓരോ തീയേറ്ററുകളിൽ നിന്നും ലഭിക്കുന്നത്. ചിരിയുടെ മലപ്പടക്കം പൊട്ടിച്ച് ജോപ്പൻ കുതിക്കുകയാണ്. കുറഞ്ഞ മുതൽമുടക്കിലെത്തിയ ഈ ജോണി ആന്റണി ചിത്രം തീയറ്ററിൽ ആളെകൂട്ടുകയാണ്.

മൂന്ന് ദിവസം കൊണ്ട് കൊച്ചിൻ മൾ‌ട്ടിപ്ലക്സിൽ നിന്നുമാത്രമായി 23.42 ലക്ഷം രൂപ ജോപ്പൻ നേടിയതായാണ് റിപ്പോർട്ടുകൾ. ആദ്യദിനം 2 കോടി കഴിഞ്ഞതായാണ് റിപ്പോ‌ർട്ടുകൾ. ചിരിയുടെ ഉത്സവം തീർക്കുന്ന ജോപ്പനും കൂട്ടരും വരും ദിവസങ്ങൾ തീയേറ്റർ അടക്കിവാഴുമെന്നാണ് പ്രതീക്ഷിക്കുന്നത്. മൂന്ന് ദിവസം കൊണ്ട് ജോപ്പൻ 4 കോടി നേടുമെന്നാണ് റിപ്പോ‌ർട്ടുകൾ. ഔദ്യോഗിക കണക്കുകൾ ഇതുവരെ പുറത്തുവിട്ടിട്ടില്ല.

എന്നിരുന്നാലും, നിഷാദ് കോയയുടെ തിരക്കഥയിൽ ജോണി ആന്റണി സംവിധാനം ചെയ്ത ഈ ചിത്രം പ്രാധാന്യം നൽകിയത് കോമഡിക്കാണ്. കുസൃതി നിറഞ്ഞ ജോപ്പനെ മലയാളികൾക്ക് ഇഷ്ട്മായി എന്നതിന്റെ തെളിവാണ് തീയേറ്ററുകളിലെ തിരക്ക്. നാലാം ദിവസവും ഹൗസ് ഫുൾ എന്നെഴുതിയ ബോർഡ് കാണാം. കുടുംബത്തിൽ കയറ്റാൻ കൊള്ളാവുന്ന സിനിമ എന്ന് മമ്മൂട്ടി പറഞ്ഞത് അക്ഷരംപ്രതി സത്യമാവുകയാണ്.