നേരത്തെ തിയേറ്ററുകളില്‍ ആധിപത്യം സ്ഥാപിച്ച മമ്മൂട്ടി ഇപ്പോഴും അത് തുടരുകയാണ്. ഹനീഫ് അദേനി തിരക്കഥയൊരുക്കി ഷാജി പാടൂര്‍ സംവിധാനം ചെയ്ത ചിത്രത്തിന് മികച്ച പ്രതികരണമാണ് ലഭിച്ചത്. ഈ സിനിമ വിജയമായതോടെ അടുത്ത ചിത്രത്തിനായി ഇരുവരും വീണ്ടും ഒരുമിക്കുന്നുവെന്ന റിപ്പോര്‍ട്ടുകളും പുറത്തുവന്നിരുന്നു.

മോഹന്‍ലാല്‍ ആരാധകര്‍ ഏറെ പ്രതീക്ഷയോടെ കാത്തിരുന്ന നീരാളി കഴിഞ്ഞ ആഴ്ചയാണ് റിലീസിനെത്തിയത്. മോഹന്‍ലാലിന്റെ ഈ വര്‍ഷത്തെ ആദ്യ സിനിമയാണെന്ന പ്രത്യേകത കൂടി നീരാളിയ്ക്ക് ഉണ്ടായിരുന്നു. 8 മാസത്തെ കാത്തിരുപ്പുകൾക്കൊടുവിലാണ് നീരാളി തിയേറ്ററിലേക്കെത്തിയത്. തിയേറ്ററിലെത്തിയ നീരാളിക്ക് പക്ഷേ ആളുകൾ ഇല്ലെന്നതാണ് വസ്തുത.

ഇന്ത്യയിലൊട്ടാകെ മുന്നൂറോളം തിയറ്ററുകളായിരുന്നു സിനിമയ്ക്ക് ലഭിച്ചിരുന്നത്. അതില്‍ 175 സ്‌ക്രീനുകളും കേരളത്തിലായിരുന്നു. അതുകൊണ്ട് തന്നെ കളക്ഷന്റെ കാര്യത്തിൽ മറ്റ് സിനിമകളെ എല്ലാം നീരാളി പൊട്ടിക്കും എന്നായിരുന്നു ആരാധകർ കരുതിയത്. എന്നാൽ, സംഭവിച്ചത് മറിച്ചായിരുന്നു.

മലയാളികള്‍ക്ക് പരിചിതമല്ലാത്ത വഴികളിലൂടെ സഞ്ചരിച്ച സര്‍വൈവല്‍ ത്രില്ലറായിരുന്നു ഇത്. കൊച്ചി മൾട്ടിപ്ലക്സിൽ ഫസ്റ്റ് ഡേ 10 ലക്ഷമെങ്കിലും നേടാന്‍ കഴിയുമെന്നായിരുന്നു പ്രതീക്ഷിച്ചിരുന്നത്. കൊച്ചി മള്‍ട്ടിപ്ലക്‌സില്‍ നിന്നും 24 ഷോയായിരുന്നു ആദ്യദിനത്തില്‍ അരങ്ങേറിയത്.

മോഹന്‍ലാലിന്റെ മുന്‍ചിത്രമായ വില്ലന്റെ കലക്ഷനെ വെട്ടാനും നീരാളിക്ക് കഴിഞ്ഞില്ലെന്നും റിപ്പോര്‍ട്ടുകള്‍ പറയുന്നു. ഒക്ടോബറിലായിരുന്നു വില്ലന്‍ തിയേറ്ററുകളിലേക്കെത്തിയത്. മഞ്ജു വാര്യരായിരുന്നു ഈ ചിത്രത്തില്‍ നായികയായി എത്തിയത്. 35 ഷോയില്‍ 11.54 ലക്ഷമായിരുന്നു ചിത്രത്തിന് ആദ്യദിനത്തില്‍ ലഭിച്ചത്.

അതേസമയം, ഈ വർഷം ഇറങ്ങിയതിൽ ഏറ്റവും അധികം പണം ആദ്യദിനം വാങ്ങിയത് മമ്മൂട്ടിയുടെ അബ്രഹാമിന്റെ സന്തതികൾ ആണ്. 20 ഷോ കളിച്ച അബ്രഹാമിന്റെ സന്തതികൾ ആദ്യ ദിനം കൊച്ചി മൾട്ടിപ്ലക്സിൽ നിന്നും സ്വന്തമാക്കിയത് 7.46 ലക്ഷം രൂപയാണ്. തൊട്ടുപിന്നാലെ പ്രണവ് മോഹൻലാലിന്റെ ആദി ഉണ്ട്. 7.12 ലക്ഷമാണ് ആദി ആദ്യദിനം നേടിയത്. എന്നാൽ, അബ്രഹാമിനേക്കാളും ആദിയേക്കാളും ഷോ കളിച്ചത് നീരാളിയാണ്. 24 ഷോകൾ ഉണ്ടായിട്ടും 6.57 ലക്ഷമാണ് നീരാളിക്ക് നേടാൻ കഴിഞ്ഞുള്ളു.

അജോയ് വര്‍മ്മ എന്ന ബോളിവുഡ് സംവിധായകന്‍ ആദ്യമായി മലയാളത്തില്‍ സംവിധാനം ചെയ്യുന്ന സിനിമയാണ് നീരാളി. മോഹന്‍ലാലിനെ നായകനാക്കി ഒരുക്കിയ സിനിമയ്ക്ക് നവാഗതനായ സാജു തോമസാണ് തിരക്കഥ ഒരുക്കിരിക്കുന്നത്.