രാജയെന്ന് കേൾക്കുമ്പോൾ മമ്മൂട്ടി ആരാധകരുടെ മനസ്സിലേക്ക് ഒരുപിടി കഥാപാത്രങ്ങളും ചിത്രങ്ങളും മിന്നിമറയുമെന്ന് ഉറപ്പ്. രാജമാണിക്യവും പോക്കിരിരാജയും രാജാധിരാജയും ഇനി വരാനിരിക്കുന്ന രാജാ 2വും. ഈ സിനിമകൾ എല്ലാം വിജയമായിരുന്നു. അടുത്തതായി വരുന്നതും രാജയാണ്. രാജകുമാരൻ!

മമ്മൂട്ടിയെ നായകനാക്കി ശ്യാംധര്‍ സംവിധാനം ചെയ്യുന്ന പുതിയ സിനിമയിലെ കഥാപാത്രത്തിന്റെ പേരിലും രാജയുണ്ട്. മുഴുവൻ പേര് കെ രാജകുമാരൻ. അധ്യാപകര്‍ക്ക് പരിശീലനം നല്‍കുന്ന രാജകുമാരന്‍. എറണാകുളത്ത് നടക്കുന്ന അധ്യാപന ശില്‍പ്പശാലയില്‍ രാജകുമാരന്‍ അധ്യാപകര്‍ക്ക് പരിശീലനം നല്‍കുന്നതാണ് കഥ.

ആദ്യ ചിത്രമായ സെവന്‍ത് ഡേ ത്രില്ലറായിരുന്നുവെങ്കില്‍ ഇക്കുറി ഫാമിലി എന്റര്‍ടെയിനറാണ് ശ്യാം ധര്‍ ഒരുക്കുന്നത്. എം ജയചന്ദ്രനാണ് സംഗീതസംവിധാനം. ദീപ്തി സതിയും ആശാ ശരതുമാണ് നായികമാരായി എത്തുന്നത്. ഈ വര്‍ഷം തന്നെ മമ്മൂട്ടി കോളേജ് അധ്യാപകനായി വേഷമിടുന്ന ചിത്രവും ഒരുങ്ങുന്നുണ്ട്. ഉദയകൃഷ്ണയുടെ രചനയില്‍ അജയ് വാസുദേവ് ആണ് ഈ സിനിമ സംവിധാനം ചെയ്യുന്നത്.