ഷാഫി മലയാളസിനിമയുടെ മര്‍മ്മമറിഞ്ഞ സംവിധായകനാണ്. പ്രേക്ഷകര്‍ക്ക് ഇഷ്ടപ്പെടുന്നത് എന്താണെന്ന് കൃത്യമായി അറിയാവുന്നയാള്‍. മലയാളികള്‍ക്ക് അടിയും വെട്ടും കുത്തുമൊന്നുമല്ല, നല്ല നര്‍മ്മത്തില്‍ പൊതിഞ്ഞ ചെറിയ സബ്ജക്ടുകളോടാണ് താല്‍പ്പര്യമെന്ന് മനസിലാക്കിയ ഷാഫി തന്‍റെ ചിത്രങ്ങള്‍ ആ രീതിയില്‍ ഒരുക്കാനാണ് ആഗ്രഹിക്കുന്നത്. ഷാഫിയുടെ മനസറിയുന്ന തിരക്കഥാകൃത്തുക്കളും എപ്പോഴും അദ്ദേഹത്തിനൊപ്പമുണ്ട്. ബെന്നി പി നായരമ്പലം, സച്ചി - സേതു തുടങ്ങിയവര്‍. ഇപ്പോഴിതാ, ആദ്യമായി ജയിംസ് ആല്‍ബര്‍ട്ട് എന്ന സൂപ്പര്‍ തിരക്കഥാകൃത്തിനൊപ്പം ചേരുകയാണ് ഷാഫി.
ക്ലാസ്മേറ്റ്സ്, സൈക്കിള്‍, ഇവിടം സ്വര്‍ഗമാണ് എന്നീ സിനിമകള്‍ക്ക് ശേഷം ജയിംസ് ആല്‍ബര്‍ട്ട് എഴുതുന്ന തിരക്കഥയാണ് ‘വെനീസിലെ വ്യാപാരി’. ഷാഫി സംവിധാനം ചെയ്യുന്ന ഈ ചിത്രത്തിലെ നായകന്‍ മമ്മൂട്ടി. തൊമ്മനും മക്കളും, മായാവി, ചട്ടമ്പിനാട് എന്നീ വന്‍ ഹിറ്റുകള്‍ക്ക് ശേഷം മമ്മൂട്ടി - ഷാഫി ടീം ഒന്നിക്കുകയാണ് വെനീസിലെ വ്യാപാരിയിലൂടെ.
കിഴക്കിന്‍റെ വെനീസായ ആലപ്പുഴയിലെ ഒരു വ്യാപാരിയുടെ വേഷത്തിലാണ് മമ്മൂട്ടി ഈ സിനിമയില്‍ അഭിനയിക്കുന്നത്. ആദിമധ്യാന്തം ചിരിച്ചുമറിയാനുള്ള എല്ലാ വകുപ്പുകളും ഷാഫി ഈ സിനിമയില്‍ ഒരുക്കുന്നുണ്ട്. മാത്രമല്ല, ഹൃദയസ്പര്‍ശിയായ ഒരു കഥയും ഈ സിനിമയ്ക്കുണ്ടെന്ന് ഷാഫി പറയുന്നു.
മുരളി ഫിലിംസ് നിര്‍മ്മിക്കുന്ന വെനീസിലെ വ്യാപാരിയിലെ നായികയെ തീരുമാനിച്ചിട്ടില്ല. ജൂലൈയില്‍ ചിത്രീകരണം തുടങ്ങി ഒക്ടോബറില്‍ റിലീസ് ചെയ്യാനാണ് പ്ലാന്‍ ചെയ്തിരിക്കുന്നത്. മമ്മൂട്ടിയുടെ പ്രശസ്ത ചിത്രങ്ങളായ മഴയെത്തും മുമ്പേ, അഴകിയ രാവണന്‍ തുടങ്ങിയ സിനിമകള്‍ നിര്‍മ്മിച്ചത് മുരളി ഫിലിംസാണ്.
