ഞാൻ എവിടെയും പോകുന്നില്ല, ഇവിടെ തന്നെ കാണും; നയം വ്യക്തമാക്കി കോലി

Written By: നെൽവിൻ വിൽസൺ

Updated: Mon, 28 Sep 2026 (08:34 IST)

Virat Kohli

വെസ്റ്റ് ഇൻഡീസിനെതിരായ ഒന്നാം ഏകദിനത്തിലെ വെടിക്കെട്ട് ഇന്നിങ്‌സിലൂടെ വിരാട് കോലി ഒരുകാര്യം ഉറപ്പിക്കുന്നുണ്ട്, '2027 ഏകദിന ലോകകപ്പാണ് ലക്ഷ്യം'. കാര്യവട്ടത്തെ ഗ്രീൻഫീൽഡ് സ്റ്റേഡിയത്തിൽ നടന്ന മത്സരത്തിൽ ഇന്ത്യ വെസ്റ്റ് ഇൻഡീസിനെ എട്ട് വിക്കറ്റിനാണ് തോൽപ്പിച്ചത്. വിരാട് കോലിയുടെ സെഞ്ചുറി കരുത്തിലാണ് ഇന്ത്യയുടെ അനായാസ ജയം. നായകൻ ശുഭ്മാൻ ഗില്ലും ഇന്ത്യക്കായി സെഞ്ചുറി സ്വന്തമാക്കി. 

സ്‌കോർബോർഡ് 

ആദ്യം ബാറ്റ് ചെയ്ത വെസ്റ്റ് ഇൻഡീസ് നിശ്ചിത 50 ഓവറിൽ ഏഴ് വിക്കറ്റ് നഷ്ടത്തിൽ 295 റൺസാണ് നേടിയത്. മറുപടി ബാറ്റിങ്ങിൽ 50 പന്തുകൾ ശേഷിക്കെ വെറും രണ്ട് വിക്കറ്റ് മാത്രം നഷ്ടപ്പെടുത്തി ഇന്ത്യ ലക്ഷ്യത്തിലെത്തി. കോലി 88 പന്തിൽ 10 ഫോറും ഒൻപത് സിക്‌സും സഹിതം 139 റൺസുമായി പുറത്താകാതെ നിന്നു. ശുഭ്മാൻ ഗിൽ 108 പന്തിൽ 13 ഫോറും ഒരു സിക്‌സും സഹിതം 110 റൺസെടുത്തു. രോഹിത് ശർമ 35 പന്തിൽ 32 റൺസ് നേടി. 

കിങ് കോലി 

വെസ്റ്റ് ഇൻഡീസിനെതിരെ കോലി നേടുന്ന പത്താം ഏകദിന സെഞ്ചുറിയാണിത്. ഏകദിന കരിയറിലെ 55-ാം സെഞ്ചുറിയം. ഏകദിന കരിയറിൽ 15,000 റൺസ് പൂർത്തിയാക്കാനും കോലിക്ക് സാധിച്ചു. 15,080 റൺസാണ് താരം ഏകദിനത്തിൽ നേടിയിരിക്കുന്നത്. 18,426 റൺസുള്ള സച്ചിൻ ടെൻഡുൽക്കർ മാത്രമാണ് ഏകദിന റൺസിൽ കോലിക്ക് മുന്നിലുള്ളത്. അതിവേഗം 15,000 റൺസ് ക്ലബിലെത്തുന്ന താരം കൂടിയായി കോലി. 303 ഇന്നിങ്‌സുകളിൽ നിന്നാണ് നേട്ടം. സച്ചിൻ 377 ഇന്നിങ്‌സുകളിൽ നിന്നാണ് 15,000 റൺസ് പൂർത്തിയാക്കിയത്. രാജ്യാന്തര കരിയറിലെ കോലിയുടെ 86-ാം സെഞ്ചുറി കൂടിയാണ് കാര്യവട്ടത്ത് നേടിയത്. 100 സെഞ്ചുറികളുള്ള സച്ചിനാണ് കോലിക്ക് മുന്നിലുള്ളത്. 

കളിയിലെ താരം കുൽദീപ് 

300 കടന്ന് കൂറ്റൻ സ്‌കോറിലേക്ക് കുതിക്കുമെന്ന് തോന്നിയ വെസ്റ്റ് ഇൻഡീസ് നിരയെ പിടിച്ചുകെട്ടിയത് കുൽദീപ് യാദവാണ്. 10 ഓവറിൽ 40 റൺസ് മാത്രം വഴങ്ങി നാല് വിക്കറ്റുകളാണ് കുൽദീപ് വീഴ്ത്തിയത്. കളിയിലെ താരവും കുൽദീപാണ്.