പാകിസ്ഥാനെതിരായ മുള്‍ട്ടാന്‍ ടെസ്റ്റില്‍ ഇരട്ടസെഞ്ചുറി കുറിച്ച് തിളങ്ങി നില്‍ക്കുകയാണ് ഇംഗ്ലണ്ട് സൂപ്പര്‍ ബാറ്ററായ ജോ റൂട്ട്. ടെസ്റ്റ് ക്രിക്കറ്റിലെ തന്റെ 35മത്തെ സെഞ്ചുറിയാണ് റൂട്ട് പാകിസ്ഥാനെതിരെ കുറിച്ചത്. നിലവില്‍ സജീവക്രിക്കറ്റിലുള്ള താരങ്ങളില്‍ ഏറ്റവുമധികം ടെസ്റ്റ് സെഞ്ചുറികളുള്ള റൂട്ട് ഇതിഹാസ താരം സച്ചിന്‍ ടെന്‍ഡുല്‍ക്കറുടെ റെക്കോര്‍ഡിന് വലിയ ഭീഷണിയാണ് സൃഷ്ടിക്കുന്നത്.

ലോകത്തെ ഏത് ബൗളിംഗ് നിരയ്‌ക്കെതിരെയും മികച്ച പ്രകടനം നടത്താനാവുന്നുണ്ടെങ്കിലും ജോ റൂട്ട് ഒരു ബൗളറെ മാത്രം ഭയപ്പെടുന്നുണ്ടെന്ന് തുറന്ന് പറഞ്ഞിരിക്കുകയാണ് ഇംഗ്ലണ്ട് മുന്‍നായകനായ മൈക്കല്‍ വോണ്‍. നിലവില്‍ ടെസ്റ്റിലെ ഒന്നാം നമ്പര്‍ ബൗളറായ ഇന്ത്യന്‍ പേസര്‍ ജസ്പ്രീത് ബുമ്രയാണ് ആ ബൗളറെന്നാണ് വോണ്‍ പറയുന്നത്. ദ ടെലഗ്രാഫില്‍ എഴുതിയ ലേഖനത്തിലാണ് മൈക്കല്‍ വോണ്‍ ഇക്കാര്യ പറഞ്ഞത്. എന്നാല്‍ അടുത്ത തവണ ബുമ്രയെ നേരിടുമ്പോള്‍ റൂട്ട് കൂടുതല്‍ തയ്യാറെടുത്തായിരിക്കും വരികയെന്നും വോണ്‍ അഭിപ്രായപ്പെട്ടു.

2025 ജൂണിലാണ് ഇംഗ്ലണ്ടിനെതിരെ ഇന്ത്യ 5 മത്സരങ്ങളടങ്ങിയ ടെസ്റ്റ് മത്സരം കളിക്കുന്നത്. സ്പിന്നര്‍മാര്‍ക്കെതിരെ നിലവില്‍ റൂട്ടിന് ദൗര്‍ബല്യങ്ങള്‍ ഒന്നുമില്ലെന്നും നിലവില്‍ ബൗളര്‍മാര്‍ക്ക് റൂട്ടിനെ പുറത്താക്കണമെങ്കില്‍ റൂട്ട് എന്തെങ്കിലും തെറ്റായി ചെയ്യേണ്ട അവസ്ഥയാണെന്നും എന്നാല്‍ ബുമ്രയുടെ കാര്യത്തില്‍ അതങ്ങനെ അല്ലെന്നും മൈക്കല്‍ വോന്‍ പറയുന്നു.