രേണുക വേണു|
Last Modified ചൊവ്വ, 23 മെയ് 2023 (10:42 IST)
Chennai Super Kings: ഐപിഎല്‍ പ്ലേ ഓഫ് മത്സരങ്ങള്‍ക്ക് ഇന്ന് തുടക്കം. ഒന്നാം ക്വാളിഫയര്‍ മത്സരം ഇന്ന് നടക്കും. പോയിന്റ് ടേബിളില്‍ ഒന്നാം സ്ഥാനത്തുള്ള ഗുജറാത്ത് ടൈറ്റന്‍സ് രണ്ടാം സ്ഥാനത്തുള്ള ചെന്നൈ സൂപ്പര്‍ കിങ്സിനെ നേരിടും. രാത്രി 7.30 മുതല്‍ ചെന്നൈയിലെ എംഎ ചിദംബരം സ്റ്റേഡിയത്തിലാണ് മത്സരം.
ഇന്നത്തെ മത്സരത്തില്‍ ജയിക്കുന്നവര്‍ നേരിട്ട് ഫൈനലില്‍ എത്തും. തോല്‍ക്കുന്നവര്‍ക്ക് ഒരു അഴസരം കൂടിയുണ്ട്. ഇന്ന് തോല്‍ക്കുന്നവര്‍ എലിമിനേറ്ററില്‍ ജയിക്കുന്നവരുമായി രണ്ടാം ക്വാളിഫയര്‍ കളിക്കണം. രണ്ടാം ക്വാളിഫയറിലെ വിജയികളായിരിക്കും ഫൈനലില്‍ ഒന്നാം ക്വാളിഫയറിലെ വിജയികള്‍ക്ക് എതിരാളികള്‍.
അതേസമയം, കണക്കുകളെല്ലാം ചെന്നൈയ്ക്ക് എതിരാണ്. ഐപിഎല്ലില്‍ ചെന്നൈ സൂപ്പര്‍ കിങ്‌സിന് ഇതുവരെ തോല്‍പ്പിക്കാന്‍ കഴിയാത്ത ടീമാണ് ഗുജറാത്ത്. മൂന്ന് തവണയാണ് ഇരു ടീമുകളും ഐപിഎല്ലില്‍ ഏറ്റുമുട്ടിയിരിക്കുന്നത്. കഴിഞ്ഞ സീസണില്‍ രണ്ട് കളികളും ഈ സീസണില്‍ ഒരു കളിയും. കഴിഞ്ഞ സീസണിലെ ആദ്യ മത്സരത്തില്‍ ഗുജറാത്ത് മൂന്ന് വിക്കറ്റിനാണ് ചെന്നൈയെ തോല്‍പ്പിച്ചത്. രണ്ടാം മത്സരത്തില്‍ ഏഴ് വിക്കറ്റിനായിരുന്നു ഗുജറാത്തിന്റെ ജയം. ഈ സീസണില്‍ ഒരു തവണയാണ് ഇരുവരും ഏറ്റുമുട്ടിയത്. അപ്പോള്‍ അഞ്ച് വിക്കറ്റ് ജയമാണ് ഗുജറാത്ത് സ്വന്തമാക്കിയത്. അഹമ്മദാബാദില്‍ വെച്ചായിരുന്നു ഈ മത്സരം. ഇന്നത്തെ ക്വാളിഫയര്‍ മത്സരത്തിനു വേദിയാകുന്നത് ചെന്നൈ ആണ്.
