ഇംഗ്ലണ്ടിനെതിരായ മൂന്നാം ഏകദിനമത്സരത്തില്‍ കേദാര്‍ ജാദവിനൊപ്പം മികച്ച പ്രകടനം പുറത്തെടുത്ത ഹാര്‍ദിക് പാണ്ഡ്യ നന്ദി പറയുന്നത് മുന്‍ ഇന്ത്യന്‍ നായകന്‍ രാഹുല്‍ ദ്രാവിഡിനോട്. ഇന്ത്യന്‍ ടീമിലേക്ക് തിരിച്ചു വരാനും നല്ല പ്രകടനം കാഴ്‌ചവയ്‌ക്കാനും സാധിച്ചത് ദ്രാവിഡിന്റെ ഉപദേശം മൂലമാണെന്നാണ് ഇന്ത്യന്‍ ഓള്‍ റൌണ്ടര്‍ പറയുന്നത്.

ട്വന്റി -20 ലോകകപ്പിന് ശേഷം കൂടുതല്‍ ഇംപ്രൂവ്‌മെന്റ് വേണമെന്ന് തോന്നി, ഈ സമയം ദ്രാവിഡ് ഭായി ഏറെ സഹായിച്ചു. മികച്ച കളി പുറത്തെടുക്കുന്നതിനും അതിന് ഉതകുന്ന മാനസികാവസ്ഥ കൈവരിക്കുന്നതിനെക്കുറിച്ചുവരെ അദ്ദേഹം എന്നോട് സംസാരിച്ചുവെന്നും പാണ്ഡ്യ വ്യക്തമാക്കി.

ഇംഗ്ലണ്ടിനെതിരായ ഏകദിന പരമ്പര വ്യക്തിപരമായി ഏറെ സഹായിച്ചു. തെറ്റുകളും വീഴ്‌ചകളും മനസിലാക്കാന്‍ കഴിഞ്ഞു. നിര്‍ണായക സമയത്ത് പുറത്തായ ഷോട്ട് ശ്രദ്ധയോടെ കളിക്കേണ്ടതായിരുന്നു. എന്നാല്‍, ആ സമയം അത്തരമൊരു ഷോട്ട് കളിക്കേണ്ടത് അത്യാവശ്യമായിരുന്നുവെന്നും പാണ്ഡ്യ പറഞ്ഞു.