ക്രിക്കറ്റ് കളിക്കുന്ന രാജ്യങ്ങളില്‍ ഏഷ്യയിലെ ഏറ്റവും കരുത്തരായ ക്രിക്കറ്റിംഗ് രാജ്യങ്ങളാണ് ഇന്ത്യയും പാകിസ്ഥാനും. ഏറെക്കാലമായി ഇരു രാജ്യങ്ങളും തമ്മില്‍ പരസ്പരം മത്സരിക്കാറില്ല എന്നതിനാല്‍ തന്നെ ഐസിസി ടൂര്‍ണമെന്റുകളില്‍ മാത്രമാണ് ഇരു ടീമുകളും ഏറ്റുമുട്ടാറുള്ളത്. ഈ മത്സരങ്ങള്‍ കാണുന്നതിന് വലിയ രീതിയില്‍ ആരാധകരും എത്താറുണ്ട്. അതിനാല്‍ തന്നെ കഴിഞ്ഞ ഏഷ്യാകപ്പിലും ഇപ്പോള്‍ നടന്നുകൊണ്ടിരിക്കുന്ന ഏഷ്യാകപ്പിലും ഇരുരാജ്യങ്ങളും തമ്മില്‍ ഫൈനല്‍ മത്സരത്തില്‍ ഏറ്റുമുട്ടണമെന്നാണ് ആരാധകര്‍ എപ്പൊഴും പ്രതീക്ഷിക്കുന്നത്.

എന്നാല്‍ ഏഷ്യാകപ്പ് ചരിത്രത്തില്‍ ഇതുവരെ എന്തെല്ലാം ചെയ്തും ആ സ്വപ്നം ഇതുവരെയും സാധ്യമായിട്ടില്ല. ഏഷ്യയില്‍ ഇന്ത്യയെയും പാകിസ്ഥാനെയും കൂടാതെ ശ്രീലങ്ക മാത്രമാണ് ഇരുടീമുകള്‍ക്കും വെല്ലുവിളിയായുള്ളത്. എന്നിട്ട് പോലും 1984 മുതല്‍ ആരംഭിച്ച ക്രിക്കറ്റ് ടൂര്‍ണമെന്റില്‍ ഇരുരാജ്യങ്ങളും തമ്മിലുള്ള ഫൈനല്‍ മത്സരങ്ങള്‍ നടന്നിട്ടില്ല. ഇതുവരെ ഇന്ത്യ ഏഷ്യാകപ്പ് ഫൈനലില്‍ എത്തിയപ്പോള്‍ ഇന്ത്യയ്ക്ക് എതിരാളികളായി വന്നത് ശ്രീലങ്ക,ബംഗ്ലാദേശ് എന്നീ രാജ്യങ്ങളാണ്. 8 തവണ ശ്രീലങ്കയോടും 2 തവണ ബംഗ്ലാദേശിനോടും ഇന്ത്യ എഷ്യാകപ്പ് ഫൈനലില്‍ ഏറ്റുമുട്ടി. 7 ഏഷ്യാകപ്പ് കിരീടങ്ങളാണ് ഇന്ത്യ ഇതുവരെ സ്വന്തമാക്കിയത്.

അതേസമയം പാകിസ്ഥാനാകട്ടെ 4 തവണ ശ്രീലങ്കയോടും ഒരു തവണ ബംഗ്ലാദേശിനോടും ഫൈനലില്‍ ഏറ്റുമുട്ടി ഇതില്‍ 2 തവണയാണ് പാകിസ്ഥാന്‍ കിരീടം സ്വന്തമാക്കിയത്. ഏഷ്യാകപ്പില്‍ ഇന്ത്യയും പാകിസ്ഥാനും തമ്മില്‍ 15 തവണ മത്സരിച്ചതില്‍ 8 തവണ ഇന്ത്യയും 5 തവണ പാകിസ്ഥാനും വിജയിച്ചു. ഇത്തവണ ഫൈനലില്‍ ശ്രീലങ്കയെ തോല്‍പ്പിക്കാനായാല്‍ ഏഷ്യാകപ്പില്‍ ഇന്ത്യയുടെ എട്ടാം കിരീടനേട്ടമാകും പിറക്കുക. ശ്രീലങ്കയാണ് വിജയിക്കുന്നതെങ്കില്‍ 7 കിരീടനേട്ടവുമായി ഇന്ത്യയ്‌കൊപ്പമെത്താന്‍ ശ്രീലങ്കയ്ക്ക് സാധിക്കും.