മെല്‍ബണ്‍|
jibin|
Last Modified വെള്ളി, 21 ഡിസം‌ബര്‍ 2018 (13:03 IST)
ഓസ്‌ട്രേലിയക്കെതിരായ മൂന്നാം ടെസ്‌റ്റില്‍ ഇന്ത്യന്‍ ടീമില്‍ വന്‍ അഴിച്ചു പണികള്‍ക്ക് സാധ്യത. ഓപ്പണിംഗ് മുതല്‍ സ്‌പിന്നര്‍മാരുടെ സ്ഥാനം വരെ അനിശ്ചിതത്വത്തിലായ പശ്ചാത്തലത്തിലാണ് പുതിയ നീക്കങ്ങള്‍ക്ക് കളമൊരുങ്ങുന്നത്.
ടീമിന് ഭാരമായി തീര്‍ന്ന കെഎല്‍ രാഹുലും ദയനീയ ഫോം തുടരുന്ന മുരളീ വിജയുമാണ് വിരാട് കോഹ്‌ലിക്ക് മുമ്പിലുള്ള വന്‍ പ്രതിസന്ധി. മൂന്നാം ഓപ്പണറായിരുന്ന പൃഥ്വി ഷാ പരിക്കേറ്റ് നാട്ടിലേക്ക് മടങ്ങിയതും വ്യക്തിപരമായ കാരണങ്ങള്‍ ചൂണ്ടിക്കാട്ടി രോഹിത് ശര്‍മ്മ വിട്ടു നില്‍ക്കുന്നതുമാണ് തിരിച്ചടിയായത്.
സാഹചര്യം മോശമായതോടെ
ഇന്ത്യ ശിഖര്‍ ധവാനെ മടക്കി വിളിച്ചതായിട്ടാണ് ഇംഗ്ലീഷ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.
ടീം താമസിക്കുന്ന ഹോട്ടലില്‍ ധവാനെ കണ്ടിരുന്നതായും സ്‌പോട്‌സ് കിറ്റുമായിട്ടാണ് താരം എത്തിയതെന്നും വിവിധ മാധ്യമങ്ങള്‍ റിപ്പോര്‍ട്ട് ചെയ്‌തു. അതേസമയം, ഇക്കാര്യത്തില്‍ കോഹ്‌ലിയോ ഇന്ത്യന്‍ മാനേജ്‌മെന്റോ ഔദ്യോഗിക പ്രഖ്യാപനങ്ങള്‍ നടത്തിയിട്ടില്ല.
ഇംഗ്ലണ്ടിലെ മോശം പ്രകടനത്തെ തുടര്‍ന്ന് പുറത്താക്കപ്പെട്ട ധാവന് ടീമില്‍ എത്തിച്ചേരാനുള്ള സുവര്‍ണാവസരമാണ് കൈവന്നിരിക്കുന്നതെന്നാണ് ആരാധകര്‍ പറയുന്നത്. ധവാന്‍ തിരിച്ചെത്തിയാല്‍ രാഹുല്‍ പ്ലേയിംഗ് ഇലവനില്‍ നിന്നും പുറത്താകുമെന്നതില്‍ സംശയമില്ല.
ഈ മാസം 26 ന് മെല്‍ബണിലാണ് മൂന്നാം ടെസ്‌റ്റ്. അഡ്‌ലെയ്‌ഡില്‍ ഇന്ത്യ ജയം പിടിച്ചെടുത്തപ്പോള്‍ പെര്‍ത്തില്‍ ഓസ്‌ട്രേലിയ ശക്തമായ തിരിച്ചു വരവ് നടത്തുകയായിരുന്നു. ഇതോടെയാണ് മൂന്നാം ടെസ്‌റ്റ് നിര്‍ണായകമായത്.
