ഇന്ത്യന്‍ സിനിമ ആകാംക്ഷയോടെ കാത്തിരുന്ന സൂപ്പര്‍ താരങ്ങള്‍ അണിനിരന്ന കല്‍കി 2898 എഡിയ്ക്ക് ആദ്യ ദിവസം ഗംഭീര വരവേല്പ്. റിലീസിന് മുന്‍പ് തന്നെ ഗംഭീരമായ പ്രീ ബുക്കിംഗാണ് സിനിമയ്ക്ക് ലഭിച്ചത്. സിനിമയുടെ ആദ്യ ദിവസകളക്ഷനെ പറ്റിയുള്ള വിവരങ്ങള്‍ പുറത്തുവരുമ്പോള്‍ ആദ്യദിനത്തില്‍ 180 കോടിയോളം രൂപയാണ് സിനിമ കളക്ട് ചെയ്തത്.

എല്ലാ ഭാഷകളിലുമായി ഇന്ത്യന്‍ ബോക്‌സോഫീസില്‍ നിന്നും ഏകദേശം 95 കോടി രൂപയാണ് സിനിമ ആദ്യദിനത്തില്‍ സ്വന്തമാക്കിയത്. ആദ്യ ദിനത്തില്‍ ഏറ്റവും കൂടുതല്‍ കളക്ഷന്‍ നേടിയ സിനിമകളില്‍ മൂന്നാം സ്ഥാനത്താണ് കല്‍കി. 223 കോടി റിലീസ് ദിനത്തില്‍ സ്വന്തമാക്കിയ ആര്‍ആര്‍ആര്‍ ആണ് കളക്ഷനില്‍ ഒന്നാം സ്ഥാനത്ത്. മറ്റൊരു രാജമൗലി സിനിമയായ ബാഹുബലിയാണ് സിനിമയില്‍ രണ്ടാം സ്ഥാനത്തുള്ളത്. ബിസി 3101ലെ മഹാഭാരത കാലഘട്ടത്തില്‍ തുടങ്ങി എഡി 2898ല്‍ സംഭവിക്കുന്ന സഹസ്രാബ്ദങ്ങള്‍ നീണ്ടുനില്‍ക്കുന്ന കഥയാണ് സിനിമ പറയുന്നത്. മഹാനടിക്ക് ശേഷം നാഗ് അശ്വിന്‍ സംവിധാനം ചെയ്യുന്ന സിനിമയില്‍ പ്രഭാസിനൊപ്പം അമിതാഭ് ബച്ചന്‍,ദീപിക പദുക്കോണ്‍,കമല്‍ഹാസന്‍,ശോഭന തുടങ്ങി വമ്പന്‍ താരനിരയാണുള്ളത്. വിജയ് ദേവരകൊണ്ട,എസ് എസ് രാജമൗലി,മൃണാള്‍ ഠാക്കൂര്‍,ദുല്‍ഖര്‍ സല്‍മാന്‍ എന്നിവരും സിനിമയില്‍ കാമിയോ വേഷങ്ങളിലുണ്ട്.