Last Modified വെള്ളി, 5 സെപ്‌റ്റംബര്‍ 2014 (14:14 IST)
ലിജോ ജോസ് പെല്ലിശേരി ഒരുക്കുന്ന മള്‍ട്ടി സ്റ്റാര്‍ ചിത്രമായ ഡബിള്‍ ബാരല്‍- ഇരട്ടക്കുഴലില്‍ പൃഥ്വിക്കും ഇന്ദ്രനുമൊപ്പം ആര്യ വരും. ചിത്രത്തിലെ നായകന്മാരായി ഫഹദ് ഫാസില്‍, പൃഥ്വിരാജ്, ഇന്ദ്രജിത്ത് എന്നിവര്‍ എത്തുമെന്നായിരുന്നു നേരത്തെയുള്ള റിപ്പോര്‍ട്ട്. എന്നാല്‍ പ്രോജക്ടില്‍നിന്ന് ഫഹദ് പിന്മാറിയെന്ന് വെബ്ദുനിയ റിപ്പോര്‍ട്ട് ചെയ്തിരുന്നു.
ഫഹദിന്റെ കരിയറിലെ ഏറ്റവും വലിയ ഹിറ്റ് നല്‍കിയ സംവിധായകനാണ് ലിജോ ജോസ് പെല്ലിശേരി. എന്നാല്‍ എന്ത് കാരണംകൊണ്ടാണ് പടത്തില്‍ ഫഹദ് സഹകരിക്കില്ലെന്ന് തീരുമാനിച്ചതെന്ന് വ്യക്തമല്ല.
കാരണം വ്യക്തമാക്കാന്‍ കഴിയില്ലെന്നും ലിജോ പറഞ്ഞിരുന്നു. ബഹുഭാഷ ചിത്രമായി അണിയിച്ചൊരുക്കുന്ന ഡബിള്‍ ബാരലിന് വേണ്ടി മറ്റൊരു പ്രമുഖ നടനെത്തുമെന്നും അദ്ദേഹം വ്യക്തമാക്കിയിരുന്നു. ഫഹദിന് പകരമായി തമിഴ് നടന്‍ ആര്യ എത്തും. പൃഥ്വിരാജിനും ഇന്ദ്രജിത്തിനും തത്തുല്യമായ വേഷമാണ് ആര്യക്കും ചിത്രത്തില്‍. മുമ്പ് ഉറുമിയില്‍ പൃഥ്വിരാജിനൊപ്പം ആര്യ അഭിനയിച്ചിരുന്നു.
ആഗസ്റ്റ് 21ന് വിവാഹിതനായ ഫഹദ് ഫാസില്‍ കുറച്ച് ദിവസങ്ങള്‍ക്കുള്ളില്‍ തന്നെ നിലവില്‍ അഭിനയിക്കുന്ന ചിത്രമായ മണിരത്നത്തിന്റെ ഷൂട്ടിംഗ് തുടരുമെന്നായിരുന്നു റിപ്പോര്‍ട്ട്. എന്നാല്‍ ഫഹദ് ഇത് വരെ ചിത്രത്തില്‍ ജോയിന്‍ ചെയ്തിട്ടില്ല. ഫഹദ് ഭാര്യ നസ്രിയയുമൊത്ത് അമേരിക്കയില്‍ ഹണിമൂണ്‍ ആഘോഷിക്കുകയാണെന്നാണ് അടുത്ത വൃത്തങ്ങള്‍ വ്യക്തമാക്കിയത്.
ഗോവയുടെ പശ്ചാത്തലത്തില്‍ ഒരുങ്ങുന്ന കോമഡി എന്റര്‍ടെയ്നറായ ഡബിള്‍ ബാരലില്‍ ആസിഫ് അലി, സണ്ണി വെയ്‌ന്‍, സ്വാതി റെഡ്ഡി, ഇഷാ ഷെര്‍വാണി, രചന എന്നിവരും പ്രധാന വേഷത്തിലെത്തുന്നു.
