ശോഭന ഇന്ത്യന്‍ സിനിമയുടെ അഭിമാനമാണ്. പല തവണ മികച്ച നടിയായി രാജ്യം ബഹുമാനിച്ച നായിക. ഇപ്പോള്‍ വല്ലപ്പോഴും മാത്രമേ ശോഭന സിനിമയില്‍ അഭിനയിക്കാറുള്ളൂ. നല്ല തിരക്കഥയില്‍ നല്ല കഥാപാത്രമാണെങ്കില്‍ മാത്രം. നൃത്തത്തിനാണ് അവര്‍ കൂടുതല്‍ പ്രാധാന്യം നല്‍കുന്നത്.
ശോഭന ഈ വര്‍ഷം ഒരു സിനിമയില്‍ അഭിനയിക്കുന്നു. രജനികാന്ത് നായകനാകുന്ന ‘കൊച്ചടിയാന്’. പൃഥ്വിരാജാണ് ഈ ചിത്രത്തില്‍ മറ്റൊരു പ്രധാന വേഷം കൈകാര്യം ചെയ്യുന്നത്. പൃഥ്വിയുടെ നായികയായി സ്നേഹ അഭിനയിക്കും.
ശോഭനയും പൃഥ്വിരാജും ആദ്യമായാണ് ഒന്നിച്ചഭിനയിക്കുന്നത്. പൃഥ്വി സജീവമാകുമ്പോഴേക്കും ശോഭന മലയാള സിനിമയില്‍ നിന്ന് അകന്നിരുന്നു. മലയാളത്തിന്‍റെ ബിഗ്സ്റ്റാറും മലയാളത്തിന്‍റെ എക്കാലത്തെയും മികച്ച നായികയും ആദ്യമായി ഒന്നിക്കുന്നത് ഒരു തമിഴ് ചിത്രത്തിലാണെന്നത് കൌതുകകരമാണ്.
രജനീകാന്തിന്‍റെ ‘ദളപതി’യില്‍ ശോഭനയായിരുന്നു നായിക. എന്നാല്‍ കൊച്ചടിയാനില്‍ രജനിക്ക് നായിക കത്രീന കൈഫാണ്. സൌന്ദര്യ രജനീകാന്തും കെ എസ് രവികുമാറും ചേര്‍ന്ന് സംവിധാനം ചെയ്യുന്ന കൊച്ചടിയാന് ബിഗ്ബജറ്റിലാണ് ഒരുങ്ങുന്നത്.
എ ആര്‍ റഹ്‌മാന്‍ സംഗീതം നല്‍കുന്ന ചിത്രത്തിന്‍റെ ക്യാമറ രത്നവേലു.
