ഇത്തവണ റിപ്പബ്ലിക് ദിനാഘോഷം ഒഴിവാക്കണമെന്ന് കോണ്‍ഗ്രസ് നേതാവ് ശശി തരൂര്‍. എന്നാല്‍ ഇത് പാര്‍ട്ടിയുടെ അഭിപ്രായമല്ലെന്ന് കോണ്‍ഗ്രസ്.

കൊവിഡ് പശ്ചാത്തലത്തില്‍ റിപ്പബ്ലിക് ദിനാഘോഷം ഒഴിവാക്കണമെന്നാണ് തരൂര്‍ ആവശ്യപ്പെട്ടത്. ആഘോഷം സംഘടിപ്പിക്കുന്നത് നിരുത്തരവാദപരമാണ്. ബ്രിട്ടണ്‍ പ്രധാനമന്ത്രി ബോറിസ് ജോണ്‍സണ്‍ ഇന്ത്യാ സന്ദര്‍ശനം റദ്ദാക്കി. റിപ്പബ്ലിക് ദിനത്തില്‍ നമ്മുടെ മുഖ്യാതിഥി വരില്ല. ആഘോഷം തന്നെ വേണ്ടെന്നുവയ്ക്കാന്‍ നമുക്ക് കഴിയില്ലേ? - ശശി തരൂര്‍ ട്വിറ്ററില്‍ കുറിച്ചു.

എന്നാല്‍ ഇത് കോണ്‍ഗ്രസിന്‍റെ അഭിപ്രായമല്ലെന്നും മറ്റെന്നത്തേക്കാള്‍ കൂടുതലായി ആഘോഷിക്കേണ്ട സമയമാണ് ഇപ്പോഴെന്നും കോണ്‍ഗ്രസ് നേതാവ് അല്‍ക്ക ലാംബ അഭിപ്രായപ്പെട്ടു.