ഉപയോഗശൂന്യമായ തോക്കുകള്‍ ഉപയോഗിച്ച് നിര്‍മ്മിച്ച ഇന്ത്യയിലെ ആദ്യത്തെ ത്രിമാനരൂപം സംസ്ഥാന പോലീസ് മേധാവി ലോക്‌നാഥ് ബെഹ്‌റ തിങ്കളാഴ്ച രാവിലെ 11 ന് പോലീസ് ആസ്ഥാനത്ത് അനാച്ഛാദനം ചെയ്യും.

ഉപയോഗ്യശൂന്യമായതും കാലഹരണപ്പെട്ടതുമായ റൈഫിളുകള്‍, റിവോള്‍വറുകള്‍, മെഗസിനുകള്‍ എന്നിവയാണ് നിര്‍മ്മാണത്തിന് ഉപയോഗിച്ചിരിക്കുന്നത്. പോലീസിന്റെ ശൗര്യവും ധൈര്യവും സൂചിപ്പിച്ചുകൊണ്ട് ശൗര്യ എന്നാണ് ഈ നിര്‍മ്മിതിക്ക് പേര് നല്‍കിയിരിക്കുന്നത്. ഒരു പോലീസ് ഉദ്യോഗസ്ഥന്‍ സല്യൂട്ട് ചെയ്യുന്ന മാതൃകയിലാണ് ത്രിമാനാകൃതിക്ക് രൂപം നല്‍കിയിരിക്കുന്നത്.

കേരള പോലീസ്, സ്റ്റേറ്റ് പോലീസ് മീഡിയ സെന്റര്‍ എന്നിവയുടെ ഔദ്യോഗിക ഫെയ്‌സ് ബുക്ക് പേജില്‍ ഇന്ന് രാവിലെ 11 മണിക്ക് ഉദ്ഘാടനചടങ്ങ് തത്സമയം കാണാന്‍ സൗകര്യം ഉണ്ടായിരിക്കും.