കോട്ടയം: മുക്കുപണ്ടം പണയംവച്ച് 1.20 ലക്ഷം തട്ടിയ ആളെ കോട്ടയം ഗാന്ധിനഗര്‍ പോലീസ് അറസ്റ്റ് ചെയ്തു. ഇടുക്കി ബൈസണ്‍വാലി പൊട്ടന്‍കാട് വാകത്താനത്ത് ബോബി ഫിലിപ്പ് എന്ന 30 കാരനാണ് പോലീസ് പിടിയിലായത്.

കോട്ടയം നാഗമ്പടത്തെ ഒരു സ്വകാര്യ സ്വര്‍ണപ്പണയ സ്ഥാപനത്തിലാണ് ഇയാള്‍ മുക്കുപണ്ടം പണയം വച്ച് പണം തട്ടിയെടുത്തത്. വിവിധ ജില്ലകളിലായി ഇത്തരത്തില്‍ പണം തട്ടിയെടുത്ത ഇരുപതോളം കേസുകളാണുള്ളതെന്നു പോലീസ് അറിയിച്ചു.

പ്രതി തൊടുപുഴ കരിമണ്ണൂരില്‍ ഒളിവില്‍ കഴിയുകയാണെന്ന രഹസ്യ വിവരം ലഭിച്ചതിനെ തുടര്‍ന്ന് പോലീസ് എത്തിയാണ് പിടികൂടിയത്. കഴിഞ്ഞ വര്‍ഷവും ഇയാളെ സമാനമായൊരു കേസില്‍ ഗാന്ധി നഗര്‍ പോലീസ് അറസ്‌റ് ചെയ്തിരുന്നു. ഇതില്‍ ജാമ്യം നേടി പുറത്ത് ഇറങ്ങിയതിനിടയിലാണ് പുതിയ കേസ്.