സീനിയര്‍ താരങ്ങള്‍ ഏകദിന ലോകകപ്പിന് ഉറപ്പ്, ടീമില്‍ വലിയ മാറ്റങ്ങളൊന്നും പ്രതീക്ഷിക്കേണ്ട; സൂചന നല്‍കി ബിസിസിഐ
ഏകദിന ലോകകപ്പിനുള്ള ഇന്ത്യന്‍ ടീമില്‍ സീനിയര്‍ താരങ്ങള്‍ ഉറപ്പായും ഉണ്ടാകുമെന്ന് സൂചന നല്‍കി ബിസിസിഐ വൃത്തങ്ങള്‍. ഏകദിന ലോകകപ്പിലേക്കുള്ള താരങ്ങളുടെ ചുരുക്കപ്പട്ടിക ആയെന്നാണ് ബിസിസിഐ പറയുന്നത്. വിരാട് കോലി, രോഹിത് ശര്‍മ തുടങ്ങിയ മുതിര്‍ന്ന താരങ്ങള്‍ ലോകകപ്പ് സ്‌ക്വാഡില്‍ ഉറപ്പായും സ്ഥാനം പിടിക്കും. ലോകകപ്പിന് മുന്‍പ് തിടുക്കത്തില്‍ ടീമില്‍ അഴിച്ചുപണി നടത്താന്‍ ബിസിസിഐ ഉദ്ദേശിക്കുന്നില്ല.
ലോകകപ്പ് ഇന്ത്യയില്‍ വെച്ച് നടക്കുന്നതിനാല്‍ പരിചയസമ്പത്തുള്ള മുതിര്‍ന്ന താരങ്ങള്‍ ടീമില്‍ വേണമെന്നാണ് ബിസിസിഐ നിലപാട്. രോഹിത് ശര്‍മ തന്നെ നായകനായി തുടരും. കെ.എല്‍.രാഹുല്‍, ശ്രേയസ് അയ്യര്‍, റിഷഭ് പന്ത്, ജസ്പ്രീത് ബുംറ തുടങ്ങിയ താരങ്ങള്‍ ടീമിലേക്ക് തിരിച്ചെത്താനും സാധ്യത.
ഏകദിന ലോകകപ്പ് സ്‌ക്വാഡില്‍ ഇവര്‍ ഉറപ്പ്: രോഹിത് ശര്‍മ, വിരാട് കോലി, കെ.എല്‍.രാഹുല്‍, റിഷഭ് പന്ത്, ജസ്പ്രീത് ബുംറ, മുഹമ്മദ് ഷമി, യുസ്വേന്ദ്ര ചഹല്‍, മുഹമ്മദ് സിറാജ്, രവിചന്ദ്രന്‍ അശ്വിന്‍, ഹാര്‍ദിക് പാണ്ഡ്യ
