Rohit Sharma: രോഹിത്തിന്റെ കാര്യത്തില് 'ഉറപ്പ്' പറയാതെ ഗംഭീര്, ബുംറയോടു മാത്രമായി ചര്ച്ച; വിരമിക്കലെന്ന് സൂചന !
സിഡ്നി ടെസ്റ്റിന്റെ ഭാഗമായി നടന്ന വാര്ത്താസമ്മേളനത്തില് രോഹിത്തിനെ കുറിച്ചുള്ള ചോദ്യത്തിനു ഗംഭീര് 'ഉറപ്പ്' നല്കിയിട്ടില്ല
Rohit Sharma
Rohit Sharma: ബോര്ഡര്-ഗാവസ്കര് ട്രോഫിയിലെ അഞ്ചാമത്തെയും അവസാനത്തെയും ടെസ്റ്റില് നിന്ന് ഇന്ത്യന് നായകന് രോഹിത് ശര്മയെ ഒഴിവാക്കിയേക്കുമെന്ന് റിപ്പോര്ട്ട്. നാളെ മുതല് (ജനുവരി 3) സിഡ്നിയിലാണ് അഞ്ചാം ടെസ്റ്റ് നടക്കുക. രോഹിത്തിന്റെ പ്രകടനത്തില് അതീവ നിരാശനായ പരിശീലകന് ഗൗതം ഗംഭീര് ആണ് താരത്തോടു ബെഞ്ചില് ഇരിക്കാന് ആവശ്യപ്പെട്ടതെന്നാണ് വിവരം.
സിഡ്നി ടെസ്റ്റിന്റെ ഭാഗമായി നടന്ന വാര്ത്താസമ്മേളനത്തില് രോഹിത്തിനെ കുറിച്ചുള്ള ചോദ്യത്തിനു ഗംഭീര് 'ഉറപ്പ്' നല്കിയിട്ടില്ല. രോഹിത് പ്ലേയിങ് ഇലവനില് ഉണ്ടാകുമോ എന്ന് മാധ്യമപ്രവര്ത്തകര് ചോദിച്ചപ്പോള് സിഡ്നിയിലെ സാഹചര്യങ്ങള് പരിശോധിച്ച ശേഷം നാളെ പ്ലേയിങ് ഇലവനില് തീരുമാനമെടുക്കുമെന്ന് മാത്രമാണ് ഗംഭീര് മറുപടി നല്കിയത്. ക്യാപ്റ്റന് ആയിട്ടു കൂടി രോഹിത് ഉറപ്പായും പ്ലേയിങ് ഇലവനില് ഉണ്ടാകുമെന്ന് പറയാന് ഗംഭീര് തയ്യാറായില്ല.
സിഡ്നിയിലെത്തിയ ടീം ഇന്ത്യ പരിശീലനം ആരംഭിച്ചിട്ടുണ്ട്. മറ്റു താരങ്ങള് പരിശീലനം നടത്തുന്നതിനിടെ പരിശീലകന് ഗംഭീര് ഇന്ത്യന് പേസര് ജസ്പ്രിത് ബുംറയുമായി ദീര്ഘനേരം ചര്ച്ച നടത്തുകയും ചെയ്തു. ബുംറയെ മാറ്റിനിര്ത്തിയായിരുന്നു ഗംഭീര് സംസാരിച്ചത്. രോഹിത് കളിച്ചില്ലെങ്കില് ബുംറയാണ് സിഡ്നിയില് ഇന്ത്യയെ നയിക്കുക.
രോഹിത് ബെഞ്ചില് ഇരിക്കേണ്ടി വന്നാല് യുവതാരം ശുഭ്മാന് ഗില് ആയിരിക്കും പ്ലേയിങ് ഇലവനില് എത്തുക. യശസ്വി ജയ്സ്വാളിനൊപ്പം കെ.എല്.രാഹുല് ഓപ്പണ് ചെയ്യുകയും ശുഭ്മാന് ഗില് വണ്ഡൗണ് ഇറങ്ങുകയും ചെയ്യും.
ഓസ്ട്രേലിയയ്ക്കെതിരായ ടെസ്റ്റ് പരമ്പരയില് അഞ്ച് ഇന്നിങ്സുകളില് നിന്ന് വെറും 31 റണ്സ് മാത്രമാണ് രോഹിത് നേടിയിരിക്കുന്നത്. 3, 6, 10, 3, 9 എന്നിങ്ങനെയാണ് ബോര്ഡര്-ഗാവസ്കര് ട്രോഫിയിലെ രോഹിത്തിന്റെ വ്യക്തിഗത സ്കോറുകള്. 6.2 മാത്രമാണ് ബാറ്റിങ് ശരാശരി.
