നായകസ്ഥാനം നഷ്ടപ്പെട്ടെങ്കിലും ഇന്ത്യന്‍ ടീമിനൊപ്പം വളരെ സന്തോഷവാനാണ് ഓള്‍റൗണ്ടര്‍ ഹാര്‍ദിക് പാണ്ഡ്യ. തന്നെ ഒഴിവാക്കി സൂര്യകുമാര്‍ യാദവിനെ നായകനാക്കിയതില്‍ പാണ്ഡ്യക്ക് അതൃപ്തി ഉണ്ടെന്ന് നേരത്തെ റിപ്പോര്‍ട്ടുകള്‍ ഉണ്ടായിരുന്നു. എന്നാല്‍ മുഖ്യ പരിശീലകന്‍ ഗൗതം ഗംഭീറിനോടും സഹതാരങ്ങളോടും വളരെ കൂളായി പെരുമാറുകയും സൗഹൃദം പങ്കുവെയ്ക്കുകയും ചെയ്യുന്ന ഹാര്‍ദിക്കിനെയാണ് പരിശീലന സെഷനില്‍ കണ്ടത്.

ശ്രീലങ്കന്‍ പര്യടനത്തിനുള്ള ഇന്ത്യന്‍ ടീം കഴിഞ്ഞ ദിവസമാണ് ലങ്കയില്‍ എത്തിയത്. ശ്രീലങ്കയില്‍ എത്തിയ ശേഷം പരിശീലകന്‍ ഗൗതം ഗംഭീറിന്റെ നേതൃത്വത്തില്‍ മൂന്ന് മണിക്കൂറോളം ടീം അംഗങ്ങള്‍ പരിശീലനം നടത്തി. ഓട്ടം, ക്യാച്ച് എന്നിവയില്‍ കേന്ദ്രീകരിച്ചുള്ള പരിശീലനത്തിനാണ് ആദ്യദിനം ഗംഭീര്‍ പ്രാധാന്യം നല്‍കിയത്. സൂര്യകുമാര്‍ യാദവ്, ഹാര്‍ദിക് പാണ്ഡ്യ തുടങ്ങിയവരെല്ലാം പരിശീലനത്തിനായി കളത്തിലിറങ്ങി.

ടീം ബസില്‍ ഗംഭീറിന്റെ തൊട്ടരികെയാണ് പാണ്ഡ്യ ഇരുന്നത്. ബസില്‍ ഇരുന്ന് ഗംഭീറുമായി പാണ്ഡ്യ കുശലാന്വേഷണം നടത്തുകയും തമാശകള്‍ പറയുകയും ചെയ്തു. സഹപരിശീലകന്‍ അഭിഷേക് നായര്‍ക്കൊപ്പമാണ് പാണ്ഡ്യ പരിശീലന സമയത്ത് കൂടുതല്‍ സമയം ചെലവഴിച്ചത്. സൂര്യകുമാര്‍ യാദവുമായി വളരെ സൗഹാര്‍ദ്ദപരമായ രീതിയിലാണ് പാണ്ഡ്യ ഇടപെട്ടത്.