‘അയാള്‍ ആ സ്ത്രീയുടെ മാറത്തേക്ക് വാ പൊളിച്ച് തുറിച്ച് നോക്കുന്നു, അവരത് കണ്ടു’ ; ചര്‍ച്ചയായി ഡോ. ഷിംന അസീസിന്റെ കുറിപ്പ്

Last Modified വെള്ളി, 7 ജൂണ്‍ 2019 (17:52 IST)
സൂപ്പര്‍മാര്‍ക്കറ്റില്‍ കണ്ട യുവാവിന്റെ പെരുമാറ്റ വൈകൃതത്തെ കുറിച്ച് ഡോ. ഷിംന അസീസിന്റെ ഫേസ്ബുക്ക് പോസ്റ്റാണ് ഇപ്പോള്‍ വൈറലായിരിക്കുന്നത്. എല്ലാവരിലും തെറ്റിന്റെയും ശരിയുടെയും അംശങ്ങളുണ്ടെന്ന് തീര്‍ച്ച. എന്നാലും, ജീവിതത്തില്‍ അഭിനയിക്കാന്‍ സാധിക്കുന്നത് വല്ലാത്തൊരു കഴിവാണ്. ആട്ടിന്‍ തോലണിഞ്ഞ ചെന്നായ്ക്കള്‍. അവരെ ശരിക്കും ഭയക്കേണ്ടതുണ്ടെന്ന് ഷിംന പറയുന്നു.

ഡോ. ഷിംന അസീസിന്റെ ഫേസ്ബുക്ക് പോസ്റ്റിന്റെ പൂര്‍ണ്ണരൂപം;

ഷോപ്പിംഗ് വല്യ ഇഷ്ടമുള്ള പരിപാടിയേ അല്ല. ‘കുട്ടികള്‍ പട്ടിണിയാകും’ എന്ന അവസ്ഥ ഒഴിവാക്കാന്‍ മാത്രം ആഴ്ചയില്‍ ഒന്നോ രണ്ടോ തവണ സൂപ്പര്‍മാര്‍ക്കറ്റില്‍ ഓടിപ്പോയി വരും. അന്നേരത്തെ ബോറടി മാറ്റാനുള്ള പ്രധാന ഉപാധി ചുറ്റുമുള്ള മനുഷ്യരെ നിരീക്ഷിക്കലാണ്. അസൂയക്കാര്‍ ഇതിന് ‘വായില്‍നോട്ടം’ എന്നൊക്കെ പറയുമെങ്കിലും എഴുതാനും ക്ലാസെടുക്കാനുമുള്ള യഥേഷ്ടം ഇന്‍പുട്ട് ഇത് വഴി കിട്ടാറുണ്ട്.

ഇന്നലെ ആ വഴി പോയപ്പോള്‍ ഒരു ചെറുപ്പക്കാരായ ദമ്പതികളെ കണ്ടു. ഓപ്പസിറ്റ് സൈഡീന്ന് ട്രോളി ഉന്തി വന്ന ആളോട് സൈഡ് തന്നതിന്റെ പേരില്‍ അവള്‍ ഹൃദ്യമായൊന്ന് ചിരിച്ചു. അയാളത് തിരിച്ചും നല്‍കി. കൂടെയുള്ള ഭര്‍ത്താവ് ഇത് കണ്ട് അവളെ നോക്കി പല്ലിറുമ്മി തുറിച്ച് നോക്കുന്നതും എന്തോ പിറുപിറുക്കുന്നതും കണ്ടു. അവളത് കണ്ടിരുന്നില്ല.

പത്ത് മിനിറ്റോ മറ്റോ കടന്ന് പോയിക്കാണണം. അടുത്ത ഷോട്ടില്‍ കാണുമ്പോള്‍ ഇയാള്‍ക്ക് മുന്നില്‍ ബില്ലിംഗില്‍ സെക്ഷനിലെ പെണ്‍കുട്ടിയും അടുത്തൊരു സ്ത്രീയും നില്‍പുണ്ട്. ഇയാള്‍ ആ സ്ത്രീയുടെ മാറത്തേക്ക് വാ പൊളിച്ച് തുറിച്ച് നോക്കുന്നു. അവരത് കണ്ടു, ഇയാളുടെ കണ്ണിലേക്ക് തന്നെ ഇമ വെട്ടാതെ നോക്കി നിന്നു. ഇത് കണ്ട് ചൂളിയ അയാള്‍ കാര്യം പന്തിയല്ലെന്ന് കണ്ട് ഭാര്യയെ വിളിച്ച് ക്യൂവില്‍ നിര്‍ത്തി റിംഗ് ചെയ്യാത്ത ഫോണെടുത്ത് ചെവിയില്‍ വച്ച് അവിടെ നിന്ന് പയ്യേ സ്‌കൂട്ടായി.

സ്വന്തം പെരുമാറ്റത്തിന്റെ അച്ചിലൂടെയാവണം ലോകത്തുള്ള സകല പുരുഷന്‍മാരെയും അയാള്‍ കാണുന്നത്. ആണിനെ വൃത്തി കെട്ടവനായി കണ്ണുമടച്ച് ചിത്രീകരിക്കുന്നത് ഇത്തരം ചില ആണുങ്ങളും അതേറ്റ് പാടുന്ന കുലസ്ത്രീ പെണ്ണുങ്ങളുമാണ്. ലോകത്തുള്ള ആണുങ്ങളെല്ലാം ‘നമ്മളെ ഇപ്പോ ബലാല്‍സംഗം ചെയ്തു കളയും’ എന്ന പൊതുബോധത്തിന്റെ സൃഷ്ടിപ്പിലും ഇത്തരം വഷളന്‍മാര്‍ക്ക് ചെറുതല്ലാത്ത പങ്കുണ്ട്. സ്ത്രീയാണെങ്കിലും പുരുഷനാണെങ്കിലും അടിസ്ഥാനപരമായി ഒരു വികാരജീവിയല്ല, മനുഷ്യജീവിയാണെന്ന് പറഞ്ഞുകൊടുക്കാന്‍ പലപ്പോഴും നമ്മള്‍ അറിഞ്ഞോ അറിയാതെയോ മറന്നു പോകുന്നുമുണ്ട്.

അത് പോലെ പലപ്പോഴും ചിലര്‍ ഉളുപ്പില്ലാതെ ചോദിക്കുന്നത് കേട്ടിട്ടുണ്ട്, ‘അത് കൊണ്ട് അയാള്‍ക്കെന്ത് ഗുണം? ഒന്നും കാണാതെ ആരെങ്കിലും എന്തെങ്കിലും ചെയ്യുമോ’ എന്ന്. സംഗതി സിമ്പിളാണ്. ഈ പറയുന്ന വ്യക്തി ഒരിക്കലും സ്വന്തം ഗുണം നോക്കാതെ ഒന്നും ചെയ്യില്ല. അങ്ങനെയും ചെയ്യാന്‍ പറ്റുമെന്ന കാര്യം പോലും ഒരു പക്ഷേ അവര്‍ക്കറിയില്ലായിരിക്കാം.

മുതിര്‍ന്നവരോട് ചോദിക്കേണ്ട ചോദ്യങ്ങള്‍ പരിഹാസച്ചുവയോടെയോ അശ്‌ളീലം പുരട്ടിയോ അവരുടെ മക്കളോട് ചോദിക്കുന്നവര്‍, അവനവന്‍ ചെയ്യുന്ന തെറ്റിനെ വെളുപ്പിക്കാന്‍ മറ്റവരും അത്തരക്കാരെന്ന് വരുത്തി തീര്‍ക്കാന്‍ പെടാപ്പാട് പെടുന്നവര്‍… പുറമേക്ക് സദാചാരം പ്രസംഗിച്ച് ലോകത്തുള്ള സകലവൈകൃതവും സ്വകാര്യമായി താലോലിക്കുന്നവര്‍… ബഹുജനം പലവിധമെന്ന് പറയാതെ വയ്യ.

എല്ലാവരിലും തെറ്റിന്റെയും ശരിയുടെയും അംശങ്ങളുണ്ടെന്ന് തീര്‍ച്ച. എന്നാലും, ജീവിതത്തില്‍ അഭിനയിക്കാന്‍ സാധിക്കുന്നത് വല്ലാത്തൊരു കഴിവാണ്. ആട്ടിന്‍ തോലണിഞ്ഞ ചെന്നായ്ക്കള്‍. അവരെ ശരിക്കും ഭയക്കേണ്ടതുണ്ട്.

നിലപാടുകളില്ലാത്ത കാപട്യം കടുത്ത ഉപദ്രവകാരിയാണ്. അത് ഏത് വഴിക്കും തിരിയാം, ചുറ്റുമുള്ളവരെ ആഞ്ഞ് കൊത്താം. നേര്‍വഴിയിലോടുന്നവര്‍ക്ക് എപ്പോള്‍ വേണമെങ്കിലും പതിനെട്ടിന്റെ പണി തരാവുന്ന വിധത്തില്‍…



ഇതിനെക്കുറിച്ച് കൂടുതല്‍ വായിക്കുക :