അഭിറാം മനോഹർ|
Last Modified തിങ്കള്‍, 21 ജൂണ്‍ 2021 (13:43 IST)
കൊല്ലം ശാസ്‌താംനടയിൽ യുവതി‌യെ ഭര്‍തൃഗൃഹത്തില്‍ തൂങ്ങിമരിച്ചനിലയില്‍ കണ്ടെത്തി. നിലമേല്‍ കൈതത്തോട് സ്വദേശി വിസ്മയ(24)യെയാണ് തിങ്കളാഴ്ച രാവിലെ ഭര്‍ത്താവ് കിരണ്‍കുമാറിന്റെ വീട്ടിൽ നിന്നും മരിച്ച നിലയിൽ കണ്ടെത്തിയത്.
സംഭവം സ്ത്രീധന പീഡനത്തെ തുടർന്നുള്ള കൊലപാതകമാണെന്ന് വിസ്‌മയയുടെ ബന്ധുക്കൾ ആരോപിച്ചു. യുവതിയുടെ മരണത്തിന് പിന്നാലെ ഭർത്താവായ കിരൺകുമാർ ഒളിവിലാണ്. കഴിഞ്ഞദിവസം വിസ്മയ സഹോദരന് അയച്ച വാട്‌സാപ്പ് സന്ദേശങ്ങളുടെ അടിസ്ഥാനത്തിലാണ് സംഭവം കൊലപാതകമാണെന്നുള്ള ബന്ധുക്കളുടെ ആരോപണം.
ഭർത്താവിന്റെ വീട്ടിൽ നിന്നും ക്രൂരമായ മർദ്ദനമേറ്റതായി ശരീരത്തിൽ മർദ്ദനമേറ്റതിന്റെ ചിത്രങ്ങളോടെ വിസ്മയ സഹോദരന് സന്ദേശം അയച്ചിരുന്നു.
ഈ സന്ദേശം ലഭിച്ച് മണിക്കൂറുകൾക്ക് ശേഷമാണ് വിസ്‌മയയെ ഭർതൃവീട്ടിൽ നിന്നും തൂങ്ങിമരിച്ച നിലയിൽ കണ്ടെത്തിയത്.
സ്ത്രീധന പീഡന പരാതി ഉയര്‍ന്നതോടെ വിഷയത്തില്‍ വനിത കമ്മീഷനും ഇടപെട്ടിട്ടുണ്ട്. വനിത കമ്മീഷ‌ൻ അംഗം ഷാഹിദ കമാല്‍ സംഭവത്തില്‍ കൊല്ലം റൂറല്‍ എസ്.പി.യോട് റിപ്പോര്‍ട്ട് തേടി. യുവതിയുടെ മൃതദേഹം പോസ്റ്റുമോര്‍ട്ടം നടപടികള്‍ക്കായി ആശുപത്രിയിലേക്ക് മാറ്റി.
