പന്ത്രണ്ട് രാജ്യങ്ങളിൽ നിന്നുള്ള സുന്ദരിമാരെ പിന്തള്ളി ഏഷ്യാ ഭൂഖണ്ഡത്തിന്റെ സൗന്ദര്യ റാണിയായി കനികാ കപൂറിനെ തെരഞ്ഞെടുത്തു. ഫിലിപ്പീൻസിൽ നിന്നുള്ള ആൽഫെ മാരി നതാനി ദാഗെഉ ഫസ്റ്റ് റണ്ണറപ്പ് കിരീടവും അസർബെയ്‌ജാനെ പ്രതിനിധീകരിച്ച ജെയ്‌ല ഗുലിയേവ സെക്കൻഡ് റണ്ണറപ്പ് സ്ഥാനവും കരസ്ഥമാക്കി.

കൊച്ചിയിലെ ലെ മെറിഡിയൻ ഹോട്ടലിൽ നടന്ന മിസ് ഏഷ്യ സൗന്ദര്യ മൽസരത്തിൽ സൗന്ദര്യ രാജ്ഞിയായി തെരഞ്ഞെടുക്കപ്പെട്ട കനികാ കപൂറിന് അഞ്ചു ലക്ഷം രൂപയാണു സമ്മാനമായി ലഭിച്ചത്. ഫസ്റ്റ് റണ്ണറപ്പിനു രണ്ടു ലക്ഷം രൂപയും സെക്കൻഡ് റണ്ണറപ്പിനു ഒരു ലക്ഷം രൂപയും സമ്മാനമായി ലഭിച്ചു.


ചൈനയെ പ്രതിനിധീകരിച്ച യാങ് വാൻടോങ്, ഉസ്ബക്കിസ്ഥാനിൽ നിന്നുള്ള മലിക കരിമോവ, ടിബറ്റിൽ നിന്നുള്ള ടെൻസിൻ യങ്സോം എന്നിവരും അവസാന റൗണ്ടിലേക്കു പ്രവേശിച്ചു. ഡൽഹി സ്വദേശിയായ കനികാ കപൂർ മിസ് ക്വീൻ ഓഫ് ഇന്ത്യാ ജേതാവായിരുന്നു. നാഷനൽ കോസ്റ്റ്യൂം, ബ്ലാക് കോക്ടെയിൽ, വൈറ്റ് ഗൗൺ എന്നിങ്ങനെ മൂന്നു റൗണ്ടുകളിലാണു മൽസരം അരങ്ങേറിയത്.


(ചിത്രത്തിന് കടപ്പാട്: മലയാള മനോരമ)