പ്രധാനമന്ത്രി മന്മോഹന്‍ സിംഗ് ഏറെ വിമര്‍ശനങ്ങള്‍ ഏറ്റുവാങ്ങിയ വര്‍ഷമാണ് 2012. പ്രതീക്ഷയ്ക്കൊത്ത് ഉയരാത്ത നേതാവ്, സോണിയയുടെ പാവ തുടങ്ങിയ അധിക്ഷേപങ്ങളാണ് അന്താരാഷ്ട്രമാധ്യമങ്ങള്‍ അദ്ദേഹത്തിന് നേരെ ഉന്നയിച്ചത്. രാഷ്ട്രത്തെ അഭിസംബോധന ചെയ്യവേ ‘സര്‍ക്കാരിന്റെ പക്കല്‍ പണം കായ്ക്കുന്ന മരമൊന്നുമില്ല’ എന്ന് പ്രധാനമന്ത്രി പറഞ്ഞതും അദ്ദേഹത്തെ വിവാദത്തിലാക്കി. കല്‍ക്കരിപ്പാടം അഴിമതി വിഷയത്തില്‍ പ്രധാനമന്ത്രിയുടെ രാജിയും പ്രതിപക്ഷം ആവശ്യപ്പെട്ടു. രാജ്യത്തെ ചില്ലറ വ്യാപാരരംഗത്ത് വിദേശനിക്ഷേപം അനുവദിക്കാനുള്ള തീരുമാനത്തിലും അദ്ദേഹം കടുത്ത പ്രതിഷേധം ക്ഷണിച്ചുവരുത്തി.
