സ്കൂള്‍ വൃത്തിയാക്കാന്‍ എത്തിയ അധ്യാപകരും വിദ്യാര്‍ഥികളും അത് കണ്ട് ഞെട്ടിത്തരിച്ചു! കാരണം വൃത്തിയാക്കുന്നതിനിടെ അവര്‍ക്ക് ലഭിച്ചത് ഒരു കോടി രൂപയും 59 ലക്ഷം രൂപയുടെ സ്വര്‍ണവുമാണ്. ജീവിതത്തില്‍ ഇന്നേവരെ ഇത്രയും തുക നേരിട്ടു കണ്ടിട്ടില്ലാത്ത അവര്‍ അത് കണ്ട് കൊതി തീര്‍ക്കുന്നതിനു മുന്നെ പൊലീസ് തൂത്തുവാരിക്കൊണ്ട് പോയി. ഗുജറാത്തിലെ ചാന്ദ്‌ഖേദായിക്ക് സമീപമുള്ള ഒഎന്‍ജിസി ക്യാമ്പസില്‍ പ്രവര്‍ത്തിക്കുന്ന കേന്ദ്രീയ വിദ്യാലയത്തില്‍ നിന്നാണ് ഇത്രയും പണവും സ്വര്‍ണ്ണവും കണ്ടെത്തിയത്.

സ്കൂളിലെ അധ്യാപകരുടെ സ്വാകാര്യ ലോക്കറുകള്‍ വൃത്തിയാക്കന്‍ ശ്രമിക്കുന്നതിനിടെയാണ് പണവും സ്വര്‍ണവും ലഭിച്ചത്. പ്രിന്‍സിപ്പലും അധ്യാപകരും ചേര്‍ന്നാണ് മുറി വൃത്തിയാക്കിയത്. അധ്യാപകരുടെ മുറിയില്‍ 20 ലോക്കറുകളാണുള്ളത്. ഇവ വൃത്തിയാക്കുന്നതിനിടയില്‍ തുറക്കാതെ കിടന്നിരുന്ന അഞ്ച് ലോക്കറുകള്‍ പൂട്ടുപൊളിച്ച് തുറന്നപ്പോഴാണ് കോടികള്‍ നിധി കണ്ടെത്തിയത്. 100 ഗ്രാം വീതമുള്ള 21 കട്ടകളായാണ് സ്വര്‍ണ്ണം സൂക്ഷിച്ചിരുന്നത്. ഇതോടെ സ്കൂളിന്റെ പ്രിംസിപ്പല്‍ പൊലീസിനെ വിവരം അറിയിക്കുകയായിരുന്നു.

പോലീസ് എത്തി സ്വര്‍ണവും പണവും പിടിച്ചെടുത്തു. സംഭവത്തില്‍ സ്‌കൂളിലെ അധ്യാപകരില്‍ നിന്നും മറ്റ് ഉദ്യോഗസ്ഥരില്‍ നിന്നും പോലീസ് മൊഴിയെടുത്തു.താന്‍ സ്‌കൂളിലെത്തിയിട്ട് രണ്ട് വര്‍ഷത്തിനിടയില്‍ ഈ ലോക്കറുകള്‍ തുറന്നിട്ടില്ലെന്ന് പ്രിന്‍സിപ്പല്‍ അവദേഷ് കുമാര്‍ പറഞ്ഞു. സംഭവത്തെ തുടര്‍ന്ന് സ്‌കൂള്‍ പൂട്ടിയിട്ടിരിക്കുകയാണ്.

മലയാളം വെബ്‌ദുനിയയുടെ ആന്‍‌ഡ്രോയ്ഡ് മൊബൈല്‍ ആപ്പ് ഡൌണ്‍‌ലോഡ് ചെയ്യാന്‍ ഇവിടെ ക്ലിക്ക്
ചെയ്യുക. ഫേസ്ബുക്കിലും ട്വിറ്ററിലും പിന്തുടരുക.