പണമുള്ളവര്‍ പണമെറിഞ്ഞ് നടത്തുന്ന കല്യാണങ്ങള്‍ പലപ്പോഴും വലിയ വാര്‍ത്തകളാകാറില്ല. എന്നാല്‍, നടത്തിപ്പിലും മറ്റും എന്തെങ്കിലും പ്രത്യേകതകള്‍ ഉണ്ടെങ്കില്‍ ഇത്തരം കല്യാണങ്ങള്‍ വാര്‍ത്തയാകാറുമുണ്ട്. അത്തരത്തില്‍ ഒരു കല്യാണവാര്‍ത്തയാണ് ബംഗളൂരുവില്‍ നിന്ന് എത്തുന്നത്.

കര്‍ണാടകയിലെ മുന്‍ ബി ജെ പി മന്ത്രി ഗലി ജനാര്‍ദ്ദനന്‍ റെഡ്ഡി മകളുടെ കല്യാണം ക്ഷണിക്കാന്‍ ഒരു വീഡിയോ തന്നെയാണ് തയ്യാറാക്കിയത്. ലക്ഷങ്ങള്‍ ചെലവഴിച്ചാണ് വിവാഹം ക്ഷണിക്കുന്നതിനുള്ള വീഡിയോ തയ്യാറാക്കിയിരിക്കുന്നത്.

നവംബറില്‍ നടക്കാനിരിക്കുന്ന മകള്‍ ബ്രഹ്‌മണിയുടെ വിവാഹത്തിന്റെ ക്ഷണമാണ് എല്‍ സി ഡി സ്ര്കീനില്‍ തെളിയുക. വിവാഹക്ഷണക്കത്ത് ഒരു പെട്ടിയിലാണ്. പെട്ടി തുറക്കുമ്പോള്‍ എല്‍ സി ഡി സ്ക്രീന്‍ തെളിയും. പിന്നെ, സ്ക്രീനില്‍ ഗലിയും കുടുംബവും തകര്‍ത്ത് അഭിനയിച്ച ഒരു മിനുട്ട് ദൈര്‍ഘ്യമുള്ള വീഡിയോ. ഗാനത്തിന് മികച്ച ചിത്രീകരണമാണ് ഒരുക്കിയിരിക്കുന്നത്.

രാജ്യത്തെ രാഷ്‌ട്രീയ-സാംസ്കാരിക രംഗത്തു നിന്നുള്ള പ്രമുഖരെല്ലാം വിവാഹത്തില്‍ അതിഥികളായെത്തും എന്നാണ് റിപ്പോര്‍ട്ടുകള്‍. അനധികൃത ഖനനത്തിന് കോടികള്‍ സമ്പാദിച്ച കുറ്റത്തിന് മൂന്നു വര്‍ഷത്തോളം തടവുശിക്ഷ അനുഭവിച്ചയാളാണ് ഗലി. കഴിഞ്ഞ ജനുവരിയില്‍ ആയിരുന്നു ഇയാള്‍ ജാമ്യത്തില്‍ ഇറങ്ങിയത്.