സിനിമയില്‍ അഭിനയിക്കുന്നതിനാല്‍ മൊഴിയെടുക്കുന്നതിനായി അവധി നീട്ടി നല്‍കണമെന്ന സരിത എസ് നായരുടെ അപേക്ഷ സോളാര്‍ കമ്മീഷന്‍ തള്ളി. അവസാന അവസരം കൊടുത്തിട്ടും സരിത ഹാജരാകാത്ത സ്ഥിതിക്ക് സരിതയുടെ വിസ്താര നടപടികൾ അവസാനിപ്പിച്ചതായി സോളർ കമ്മിഷൻ ജസ്റ്റിസ് ജി ശിവരാജൻ വ്യക്തമാക്കി.

സോളാര്‍ കേസുമായി ബന്ധപ്പെട്ട പല തെളിവുകളും ഹാജരാക്കാമെന്നു സരിത നേരത്തെ കമ്മീഷനില്‍ പറഞ്ഞിരുന്നു. ഇനി സരിതയെ വിളിക്കാൻ കമ്മിഷൻ ഉദ്ദേശിക്കുന്നില്ല. കൂടാതെ കമ്മിഷനു പല കാര്യങ്ങളിലും സരിതയിൽനിന്ന് വ്യക്തത വരുത്താനുമുണ്ടായിരുന്നു. എന്നാൽ, പലതവണ അവസരം നൽകിയിട്ടും സരിത ഹാജരാകാത്ത സ്ഥിതിക്ക് ഇനി സമയം കളയാൻ കഴിയില്ലെന്നും കമ്മീഷന്‍ അറിയിച്ചു.

അതേസമയം,ഈ കേസുമായി ബന്ധപ്പെട്ട തെളിവുകൾ എന്തെങ്കിലും നൽകാനുണ്ടെങ്കിൽ സരിതയ്ക്കു ഹാജരാക്കാം. അത് അന്വേഷണത്തെ സഹായിക്കുന്ന തെളിവായി ബോധ്യപ്പെടുകയാണെങ്കില്‍ മാത്രം പരിഗണിക്കുമെന്നും കമ്മിഷൻ വ്യക്തമാക്കി.