നിയമനടപടിക്ക്​ അനുവാദം നൽകിയാൽ തെറ്റായ കീഴ്​വഴക്കം സൃഷ്​ടിക്കുമെന്നതിനാലാണ്​ മുഖ്യമന്ത്രി ഉമ്മൻചാണ്ടിക്കെതിരെ നിയമനടപടിക്ക്​ ഡിജിപി ​ജേക്കബ്​ തോമസിന്​ അനുമതി നല്‍കാതിരുന്നതെന്ന് ആഭ്യന്തരമന്ത്രി രമേശ്​ ചെന്നിത്തല. ഇതു സംബന്ധിച്ച ഫയൽ നേരിട്ടു കണ്ടശേഷം ത​ന്റെ അറിവോടെയാണ് ഇത്തരമൊരു തീരുമാനം എടുത്തതെന്നും അദ്ദേഹം പറഞ്ഞു.

രാജന്‍ബാബുവിനെ യുഡിഎഫ് യോഗത്തിലേക്കു ക്ഷണിക്കുന്നത് ശരിയല്ലെന്നാണ് ത​ന്റെ വ്യക്തിപരമായ അഭിപ്രായം. ബി.ജെ.പിയുമായും ആര്‍എസ്എസുമായും വെള്ളാപ്പള്ളിയുമായും ചേര്‍ന്നു നിന്ന് യുഡിഎഫിനു വിരുദ്ധമായി നില്‍ക്കുകയാണ്​ രാജന്‍ബാബു. ജെഎസ്എസ് പിളര്‍ന്നപ്പോള്‍ രാജന്‍ബാബുവിനെയും സിഎംപി പിളർന്നപ്പോൾ
സിപി ജോണിനെയും യുഡിഎഫില്‍ കൂട്ടിയത് ഘടകകക്ഷിയായല്ലെന്നും വ്യക്തികളായിട്ടാണെന്നും അദ്ദേഹം പറഞ്ഞു.


വിഎം സുധീര​ന്റെ ജനപക്ഷയാത്ര ഫാസിസ്റ്റ്, വര്‍ഗീയ, കൊലപാതക, അക്രമ രാഷ്ട്രീയത്തിനെതിരെയുള്ള ഉദ്ബോധനത്തിനു സഹായകമാകും. സ്കൂള്‍ കലോത്സവങ്ങളില്‍ വിധികര്‍ത്താക്കള്‍ കോഴ വാങ്ങുന്നതിനെക്കുറിച്ച് അന്വേഷിക്കാന്‍ വിദ്യാഭ്യാസവകുപ്പ് ആവശ്യപ്പെട്ടാല്‍ വിജിലന്‍സ് അന്വേഷണത്തിന് ഉത്തരവിടുമെന്നും ചെന്നിത്തല പറഞ്ഞു.