പാകിസ്ഥാനിൽ കഴിയുന്ന അധോലോക കുറ്റവാളിയായ ദാവൂദ് ഇബ്രാഹിം കൊവിഡ് ബാധിച്ച് മരിച്ചതായി സ്ഥിരീകരിക്കാത്ത വാർത്ത.കറാച്ചിയിലെ സൈനിക ആശുപത്രിയിൽ വച്ചാണ് ദാവൂദ് മരിച്ചതായി ചില ദേശീയ മധ്യമങ്ങൾ റിപ്പോർട്ട് ചെയ്‌തു. എന്നാൽ ഇതിന്റെ സത്യാവസ്ഥ എന്തെന്ന് വ്യക്തമായിട്ടില്ല. സമൂഹമാധ്യമങ്ങളിലും ഇത് സംബന്ധിച്ച അഭ്യൂഹങ്ങൾ പരക്കുന്നുണ്ട്.

ദാവൂദ് ഇബ്രാഹിമിനും ഭാര്യ മെഹജബീൻ ഷെയ്ഖിനും കോവിഡെന്ന് ഇന്റലിജൻസ് വൃത്തങ്ങൾ കഴിഞ്ഞ ദിവസം അറിയിച്ചിരുന്നു. എന്നാൽ ഇത് ശരിയല്ലെന്ന് ദാവൂദിന്റെ സഹോദരനും അധോലോക സംഘമായ ഡി കമ്പനിയുടെ മേധാവിയുമായ അനീസ് ഇബ്രാഹിം വെളിപ്പെടുത്തി.

അതേസമയം ഇതാദ്യമായല്ല ദാവൂദ് ഇബ്രാഹിം മരിച്ചതായുള്ള വാർത്തകൾ പ്രചരിക്കുന്നത്.മുംബൈ സ്ഫോടനക്കേസ് അടക്കം ഇന്ത്യയിലെ ഒട്ടേറെ കേസുകളിൽ പ്രതിയായ ദാവൂദ് കറാച്ചിയിൽ ചികിത്സയിലാണെന്ന വിവരമാണ് വെള്ളിയാഴ്‌ച പുറത്തുവന്നത്. ദാവൂദ് പാകിസ്ഥാനിൽ ഇല്ലെന്നാണ് പാകിസ്ഥാന്റെ നിലപാട്.