സിനിമാ പ്രേമികള്‍ക്കായി ഇതാ ഒരു ക്രിസ്മസ് സമ്മാനം, വര്‍ഷങ്ങളുടെ കാത്തിരിപ്പിനൊടുവില്‍ നിത്യ മേനോന്റെ 'കോളാമ്പി' ഒ.ടി.ടി റിലീസിന്
കെ ആര്‍ അനൂപ്|
Last Modified ചൊവ്വ, 7 ഡിസം‌ബര്‍ 2021 (11:16 IST)
നിത്യ മേനോന്‍ നായികയാവുന്ന ടി.കെ. രാജീവ് കുമാര്‍ ചിത്രമാണ് കോളാമ്പി.2019ല്‍ നിര്‍മ്മാണം പൂര്‍ത്തിയാക്കിയ സിനിമ ഇതുവരെ റിലീസ് ചെയ്തിട്ടില്ല. രഞ്ജി പണിക്കര്‍, നിര്‍മ്മാതാവ് സുരേഷ്‌കുമാര്‍ തുടങ്ങിയവരെ വ്യത്യസ്ത ഗെറ്റപ്പുകളില്‍ എത്തുന്ന ഈ സിനിമ കോളാമ്പികളുടെ കഥയാണ് പറയുന്നത്. മാസങ്ങള്‍ക്കുമുമ്പ് പുറത്തിറങ്ങിയ ട്രെയിലര്‍ ഒരു ഫീല്‍ ഗുഡ് മൂവി അനുഭവമാണ് പ്രേക്ഷകന് നല്‍കിയത്. വര്‍ഷങ്ങളുടെ കാത്തിരിപ്പിനുശേഷം സിനിമ പ്രേക്ഷകരിലേയ്ക്ക് എത്തുകയാണ്.
24/12/2021-ന് ക്രിസ്മസ് റിലീസായി കോളാമ്പി എത്തുമെന്ന് സംവിധായകന്‍ അറിയിച്ചു.അന്തര്‍ദേശീയ ഒ.ടി.ടി പ്ലാറ്റ്ഫോമായ MTALKIE ല്‍ ചിത്രം റിലീസ് ചെയ്യും. അവരുടെ പ്ലാറ്റ്ഫോമില്‍ റിലീസ് ചെയ്യുന്ന ആദ്യത്തെ ചിത്രമാണ് കോളാമ്പി.
നീണ്ട ഇടവേളയ്ക്കു ശേഷം രാജീവ് കുമാര്‍ സംവിധാന രംഗത്തു മടങ്ങി വന്ന ചിത്രം കൂടി ആയിരുന്നു ഇത്.നിര്‍മ്മാല്യം സിനിമയുടെ ബാനറില്‍ രൂപേഷ് ഓമനയാണ് ചിത്രം നിര്‍മ്മിക്കുന്നത്.
