BIJU|
Last Modified ചൊവ്വ, 2 മെയ് 2017 (13:41 IST)
ഇന്ത്യന്‍ സിനിമ കണ്ട എക്കാലത്തെയും വലിയ ഹിറ്റായി
ബാഹുബലി 2 മാറിക്കഴിഞ്ഞു. എല്ലാ ബിസിനസുകളും ചേര്‍ത്ത് ഇതുവരെ 1000 കോടിയും കടന്ന് കളക്ഷന്‍ കുതിക്കുകയാണ്. ഇപ്പോഴിതാ, ബാഹുബലിയുടെ ഈ കുതിപ്പിന് തടയിടാന്‍ മലയാളത്തിന്‍റെ പ്രിയനടന്‍ മോഹന്‍ലാല്‍ !
പുലിമുരുകനിലൂടെയാണ് ബാഹുബലിക്ക് മൂക്കുകയറിടാനുള്ള ശ്രമം തെലുങ്ക് നാട്ടില്‍ നടക്കുന്നത്. പുലിമുരുകന്‍റെ തെലുങ്ക് പതിപ്പായ ‘മന്യം പുലി’ മേയ് ആറിന് റീ റിലീസ് ചെയ്യുകയാണ്. ബാഹുബലി തരംഗത്തിനിടയിലും മന്യം പുലി റീ റിലീസ് ചെയ്യാനുള്ള തീരുമാനം ഏവരെയും അത്ഭുതപ്പെടുത്തിയിരിക്കുകയാണ്.
കഴിഞ്ഞ ഡിസംബര്‍ രണ്ടിന് ആന്ധ്രയിലും തെലങ്കാനയിലും 350 തിയേറ്ററുകളില്‍ മന്യം പുലി റിലീസ് ചെയ്തിരുന്നു. അന്ന് 50 ദിവസം നിറഞ്ഞോടിയ ചിത്രം 12 കോടിയിലധികം കളക്ഷന്‍ നേടിയിരുന്നു. ഒരു മലയാള സിനിമയുടെ തെലുങ്ക് ഡബ്ബിംഗ് പതിപ്പ് ഇത്രയും വലിയ കളക്ഷന്‍ നേടിയതോടെ ചിത്രം റീ റിലീസ് ചെയ്യാന്‍ അണിയറ പ്രവര്‍ത്തകര്‍ തീരുമാനിക്കുകയായിരുന്നു.
ബാഹുബലിയുടെ തരംഗം നിലനില്‍ക്കുന്നുണ്ടെങ്കിലും മോഹന്ലാലിന്റെ തകര്‍പ്പന്‍ ആക്ഷന്‍ രംഗങ്ങളുള്ള മന്യം പുലിയെ വീണ്ടും തെലുങ്ക് പ്രേക്ഷകര്‍ സ്വീകരിക്കുമെന്ന വിശ്വാസത്തിലാണ് വൈശാഖും ഉദയ്കൃഷ്ണയും ടോമിച്ചന്‍ മുളകുപാടവും.
