aparna shaji|
Last Modified ചൊവ്വ, 21 ജൂണ്‍ 2016 (15:44 IST)
സംസ്കൃതത്തില്‍ ‘ഭുജംഗ’ എന്ന വാക്കിന് മൂര്‍ഖന്‍പാമ്പ് എന്നാണ് അര്‍ത്ഥം. അതായത്, ഭുജംഗാസനം ചെയ്യുമ്പോഴത്തെ ശാരീരിക സ്ഥിതി മൂര്‍ഖന്‍ പാമ്പിനെ അനുസ്മരിപ്പിക്കും.
ചേയ്യേണ്ട രീതി:
* വളരെ ലളിതമായി ചെയ്യാവുന്ന ആസനമായതിനാല്‍ ചെയ്യുമ്പോള്‍ തെറ്റ് വരാനും എളുപ്പമാണ്. അതിനാല്‍, വിശദീകരണം നല്ലവണ്ണം മനസ്സിലാക്കിയ ശേഷം ഈ യോഗാ‍സനം ചെയ്യുക. ഈ ആസന സ്ഥിതി വളരെ ലാഘവത്തോടെയും സാവധാനവുമാണ് ചെയ്യേണ്ടത്. പുറത്തെ മസിലുകള്‍ക്ക് ബലം കൊടുക്കുകയോ വേഗത്തില്‍ ചലിക്കുകയോ ചെയ്യരുത്.
* ശലഭാസനം, ധനുരാസനം എന്നിവ ചെയ്യുമ്പോള്‍ ഭുജംഗാസനവും ചെയ്യാം. ഈ രണ്ട് ആസനങ്ങളുടെയും പൂരകമാണ് ഭുജംഗാസനം.
* തറയില്‍ കമിഴ്ന്ന് കിടക്കുക. കാലുകള്‍ രണ്ടും ചേര്‍ത്ത് പിടിച്ച് കാല്‍‌വിരലുകള്‍ വെളിയിലേക്ക് ചൂണ്ടുന്നരീതിയിലായിരിക്കണം. കൈകള്‍ ശരീരത്തിനിരുവശവും കൈപ്പത്തി മുകള്‍ വശത്തിന് അഭിമുഖമായ രീതിയില്‍ വയ്ക്കുക.
* കൈമുട്ടുകള്‍ മടക്കി കൈപ്പത്തികള്‍ ശരീരത്തിനിരുവശവുമായി ഊന്നുക. ഇപ്പോള്‍ തള്ളവിരല്‍ കക്ഷത്തിനു താഴെയായിരിക്കണം.
* ഇനി നെറ്റി നിലത്ത് മുട്ടിച്ച ശേഷം താടി നിലത്തു നിന്ന് ഉയര്‍ത്തി കഴുത്ത് ആവുന്നിടത്തോളം പിന്നിലേക്ക് വളയ്ക്കണം. ശേഷം, നെഞ്ചും ഉയര്‍ത്തണം. ഈ സമയത്ത് നാഭിക്ക് തൊട്ടു മുകളില്‍ വരെയുള്ള ശരീര ഭാഗം വരെ ഉയരത്തക്കവണ്ണം നട്ടെല്ല് പിന്നിലേക്ക് വളയ്ക്കണം. നാഭീഭാഗം തറയില്‍ അമര്‍ന്നിരിക്കാന്‍ ശ്രദ്ധിക്കുക.
* ഈ സ്ഥിതിയില്‍ കുറച്ചുനേരം തുടര്‍ന്ന ശേഷം പൂര്‍വാവസ്ഥയിലേക്ക് മടങ്ങാം. ആദ്യം നാഭിക്കുമുകളിലുള്ള ഭാഗം പിന്നീട് ശിരോഭാഗം എന്ന രീതിയിലായിരിക്കണം പൂര്‍വാവസ്ഥയിലെത്തേണ്ടത്. കൈകള്‍ ശരീരത്തിന് ഇരുവശവും കൊണ്ടുവന്ന ശേഷം കാലുകള്‍ പരമാവധി അകറ്റി വിശ്രമിക്കാം. ഈ അവസരത്തില്‍ കൈകള്‍ രണ്ടും പിണച്ച് വച്ച് അതിന്‍‌മേല്‍ നെറ്റി വയ്ക്കാം.
പ്രയോജനങ്ങൾ:
* ക്രമമല്ലാത്ത ആര്‍ത്തവചക്രം മൂലമുള്ള വിഷമതകള്‍ ഇല്ലാതാക്കുന്നു.
* ഗര്‍ഭപാത്ര സംബന്ധിയായ അസുഖങ്ങള്‍ക്ക് പരിഹാരമാവുന്നു.
* അടിവയറിന് സമ്മര്‍ദ്ദം നല്‍കുന്നതിനാല്‍ അണ്ഡാശയത്തിനും വസ്തി പ്രദേശത്തിനും ഗുണകരമാണ്.
*ഭുജംഗാസനം ചെയ്യുന്നത് പാന്‍‌ക്രിയാസിനെ ഉത്തേജിപ്പിക്കുന്നതിനാല്‍ പ്രമേഹത്തിനെ പ്രതിരോധിക്കാനും ഒരളവുവരെ
സഹായിക്കുന്നു.
* താഴ്ന്ന രക്ത സമ്മര്‍ദ്ദമുള്ളവര്‍ക്ക് ഭുജംഗാസനം പ്രയോജനം ചെയ്യും.
* കുടലുകള്‍ക്ക് സമ്മര്‍ദ്ദം ലഭിക്കുന്നതിനാല്‍ സ്ഥാനമാറ്റം ഉണ്ടാവാതെ സൂക്ഷിക്കാനും ഈ ആസനം സഹായകമാണ്.
* ആന്ത്രവായു മൂലമുള്ള പ്രശ്നങ്ങളും പരിഹരിക്കപ്പെടുന്നു.
* കഴുത്ത്, പുറം വേദനകള്‍ക്കുള്ള ഒരു പരിഹാരമാണ് ഭുജംഗാസനം.
* ഓഫീസില്‍ ഇരുന്ന് ജോലി ചെയ്യുന്നവര്‍ക്ക് ഈ ആസനം ചെയ്യുന്നതിലൂടെ മനസ്സിനും ശരീരത്തിനും ഉണര്‍വ് ലഭിക്കുന്നു.
