മലയാള സിനിമയിൽ ഡ്യൂപ്പില്ലാതെ അഭിനയിക്കുന്ന നടന്മാർ കുറവാണെന്നാണ് പൊതുവെയുള്ള സംസാരം. മെഗാസ്റ്റാർ മമ്മൂട്ടി ഡ്യൂപ്പ് ഇട്ട് അഭിനയിച്ചതൊക്കെ എല്ലാവർക്കും അറിയാവുന്ന കാര്യമാണ്. എന്നാൽ, ഡ്യൂപ്പ് ഇല്ലാതെ മമ്മൂട്ടി അഭിനയിച്ച സാഹസികത നിറഞ്ഞ രംഗങ്ങളും സിനിമകളും ചുരുക്കമല്ല.

അക്കൂട്ടത്തിൽ ഒന്നാണ് ജാക്ക്പോട്ട് എന്ന സിനിമയും. ജോമോന്‍ സംവിധാനം ചെയ്ത ചിത്രം അക്കാലത്തെ വലിയ സൂപ്പര്‍ഹിറ്റുകളില്‍ ഒന്നായിരുന്നു. ചിത്രത്തിന്റെ അൻപതാം ദിവസം ഇറക്കിയ പോസ്റ്ററിനൊപ്പം മമ്മൂട്ടി ഒരു കത്തും പുറത്തുവിട്ടിരുന്നു. ചിത്രത്തിൽ അഭിനയച്ചപ്പോൾ ഉണ്ടായ സാഹസികാനുഭവം വിവരിക്കുന്ന കുറിപ്പാണ് മമ്മൂട്ടി പുറത്തുവിട്ടത്. ചിത്രം കണ്ടവരാരും അതിന്റെ ക്ലൈമാക്സ് ആക്ഷൻ രംഗങ്ങൾ മറക്കാൻ ഇടയുണ്ടാകില്ല.

ചിത്രത്തിന്റെ ക്ലൈമാക്സ് ചിത്രീകരണത്തിനിടെ പന്തയക്കുതിരയ്ക്ക് മുകളിൽ നിന്ന് വീണ് പരുക്ക് പറ്റുകയുണ്ടായി. 18 ദിവസം മദ്രാസിലെ 37 ഡിഗ്രി സെൽഷ്യസിൽ താൻ ഏറെയും കുതിരപ്പുറത്തായിരുന്നുവെന്ന് മമ്മുട്ടി എഴുതുന്നുണ്ട്. 9 കിലോ കുറഞ്ഞു, ഓടിയിട്ടല്ല പേടിച്ചിട്ട്. അൽപ്പമൊന്ന് ഓടിച്ചുപിടിച്ചു കഴിഞ്ഞാൽ ഞരബൊക്കെ പൊങ്ങിവരും, പിന്നെ ഓട്ടം തന്നെ ഓട്ടം. ആരു പിടിച്ചാലും നിൽക്കില്ല.

ക്ലൈമാക്സ് ചിത്രീകരണത്തിനിടെ തുടയിലെ തൊലി മുഴുവൻ പോയി കാലിലെയും നടുവിലെയും സകല എല്ലുകളും പൊടിഞ്ഞ പോലെയായി. വേദന കൊണ്ട് പല രാത്രികൾ ഉറങ്ങാൻ കഴിഞ്ഞില്ല. 5 ദിവസം വരെ പനിച്ചുകിടന്നു. എന്നാൽ ചിത്രം വിജയിച്ചുവെന്ന് കേൾക്കുമ്പോഴായിരുന്നു ആശ്വാസമെന്ന് എഴുത്തിൽ പറയുന്നുണ്ട്.