BIJU|
Last Modified ശനി, 10 മാര്‍ച്ച് 2018 (19:48 IST)
ഒരു
സിനിമ വരുന്നുണ്ട്. ‘100 ഇയേഴ്സ്’ എന്നാണ് പേര്. സ്പൈ കിഡ്, സിന്‍ സിറ്റി തുടങ്ങിയ സിനിമകളുടെ സ്രഷ്ടാവ് റോബര്‍ട്ട് ആന്തണി റോഡ്രിഗ്യൂസ് ആണ് സംവിധായകന്‍. കേട്ടപ്പോള്‍ സന്തോഷമായോ? എങ്കില്‍ ഇതുകൂടി അറിഞ്ഞോളൂ. ഇപ്പോള്‍ ജീവിച്ചിരിക്കുന്നവരില്‍ മിക്കവര്‍ക്കും ഈ സിനിമ കാണാന്‍ കഴിയില്ല.
എന്താണ് കാരണമെന്നോ? ചിത്രം റിലീസ് ചെയ്യുന്നത് 2115 നവംബര്‍ 18നാണ് എന്നതുതന്നെ. അതായത് ഏകദേശം 100 വര്‍ഷങ്ങള്‍ക്ക് ശേഷം.
ജോണ്‍ മാല്‍ക്കോവിച്ചാണ് ഈ സിനിമയ്ക്ക് തിരക്കഥ എഴുതുന്നതും പ്രധാന കഥാപാത്രത്തെ അവതരിപ്പിക്കുന്നതും. എന്താണ് കഥയെന്നതും മറ്റ് കാര്യങ്ങളുമൊക്കെ അതീവ രഹസ്യമാക്കി വച്ചിരിക്കുകയാണ്.
രണ്ടുമൂന്ന് വര്‍ഷങ്ങള്‍ക്ക് മുമ്പ് ചിത്രത്തിന്‍റെ ടീസര്‍ അണിയറ പ്രവര്‍ത്തകര്‍ പുറത്തിറക്കിയിരുന്നു. എന്നാല്‍ അതില്‍ നിന്നും ചിത്രത്തിന്‍റെ സ്വഭാവമെന്തെന്ന് മനസിലാക്കാന്‍ കഴിയില്ല.
ഈ സിനിമയുടെ ഷൂട്ടിംഗ് പൂര്‍ത്തിയാക്കി പോസ്റ്റ് പ്രൊഡക്ഷന്‍ എല്ലാം കഴിഞ്ഞ് ഫൈനല്‍ ഔട്ട് വന്നുകഴിഞ്ഞാല്‍ ഉടന്‍ തന്നെ ബുള്ളറ്റ് പ്രൂഫ് ഗ്ലാസ് കൊണ്ട് മൂടിയ ഒരു സേഫിനുള്ളില്‍ ഭദ്രമാക്കി വയ്ക്കും. 2115 നവംബര്‍ 18ന് ഈ സേഫ് ഓട്ടോമാറ്റിക്കായി തുറക്കും. അന്ന് മാത്രമേ തുറക്കാന്‍ കഴിയൂ. ലോഹപാളികളാല്‍ സംരക്ഷിക്കപ്പെട്ട രീതിയില്‍ 1000 അതിഥികള്‍ക്കുള്ള ടിക്കറ്റുകളും തയ്യാറാക്കി വച്ചിട്ടുണ്ട്. ആ അതിഥികളുടെ അന്നത്തെ അനന്തരാവകാശികള്‍ക്ക് ടിക്കറ്റ് കൈമാറുകയും അവര്‍ക്കായി ചിത്രത്തിന്‍റെ ആദ്യപ്രദര്‍ശനം നടത്തുകയും ചെയ്യും.
