മുംബൈ|
jibin|
Last Updated:
ചൊവ്വ, 16 ഓഗസ്റ്റ് 2016 (14:29 IST)
മുംബൈ സ്‌ഫോടനക്കേസിലെ മുഖ്യപ്രതിയും അധോലോക രാജാവുമായ ദാവൂദ് ഇബ്രാഹിമിന്റെ അനന്തരവൻ അലിഷാ പാർക്കറിന്റെ വിവാഹം നാളെ. മുംബൈയില്‍ നടക്കുന്ന വിവാഹ ചടങ്ങുകള്‍ ദാവൂദ് സ്കൈപ്പിലൂടെ കാണുമെന്നാണ് ഒരു ദേശീയ മാധ്യമം റിപ്പോർട്ട് ചെയ്‌തിരിക്കുന്നത്.
ദാവൂദിന്റെ സഹോദരി ഹസീന പർകറിന്റെ ഇളയ മകനാണ് അലിഷാ. ചടങ്ങുകള്‍ ദാവൂദിന് കാണാനുള്ള സൗകര്യങ്ങൾ അദ്ദേഹത്തിന്റെ അനുയായികള്‍ ചെയ്‌തു കഴിഞ്ഞെന്നാണ് പുറത്തു വരുന്ന വാര്‍ത്ത. മുംബൈയിലെ റസൂൽ പള്ളിയിലാണ് വിവാഹചടങ്ങുകൾ. വൈകുന്നേരം ജുഹുവിലെ തുലിപ്പ് സ്‌റ്റാർ ഹോട്ടലിൽ വച്ച് റിസപ്‌ഷനും തീരുമാനിച്ചിട്ടുണ്ട്.
ആഘോഷങ്ങൾക്ക് നേതൃത്വം നൽകാൻ മുംബൈയിലെ തന്റെ സഹായിയെയാണ് ദാവൂദ് ചുമതലപ്പെടുത്തിയിരിക്കുന്നത്.
വിവാഹത്തിന് മറ്റ് തടസങ്ങളൊന്നും ഉണ്ടാവാതിരിക്കാൻ ദാവൂദ് തന്റെ ആളുകൾക്ക് നിർദേശം നൽകി.
ദാവൂദിന്റെ സഹോദരൻ ഇക്ബാൽ കസ്കർ, സഹോദരിമാരായ സെയ്റ്റൂൺ, ഫർസാന തുടങ്ങിയവരും വിവാഹത്തിൽ പങ്കെടുക്കും.
ഹസീനയുടെ ജീവിച്ചിരിക്കുന്ന ഒരെയൊരു മകനാണ് അലിഷാ. അതിനാൽ വളരെ ഗംഭീരമായി തന്നെ വിവാഹം നടത്താനാണ് പദ്ധതി. ഇയാളുടെ മൂത്ത സഹോദരൻ ദാനിഷ് 2006ൽ ഉണ്ടായ ഒരു റോഡ് അപകടത്തിൽ കൊല്ലപ്പെട്ടിരുന്നു.
ഈ സാഹചര്യത്തില്‍ കനത്ത സുരക്ഷയാണ് പൊലീസ് നഗരത്തില്‍ ഒരുക്കിയിരിക്കുന്നത്. പാകിസ്ഥാനില്‍ ഒളിവില്‍ കഴിയുന്ന ദാവൂദിന് ഐ എസ് ഐ ആണ് സുരക്ഷ നല്‍കുന്നത്.
