പത്തനംതിട്ട: യുവതിയെ പീഡിപ്പിച്ചു ലക്ഷങ്ങൾ തട്ടിയെടുത്തയാൾ 13 വർഷങ്ങൾക്ക് ശേഷം പിടിയിലായി. മലപ്പുറം മൂത്തേടം തച്ചേടത്ത് വീട്ടിൽ സുരേഷ് കെ.നായർ എന്ന 54 കാരനാണ് പോലീസ് പിടിയിലായത്.

യുവതിയെ പീഡിപ്പിച്ച ശേഷം യുവതിയുടെ നഗ്നവീഡിയോ പ്രചരിപ്പിക്കും എന്ന് ഭീഷണിപ്പെടുത്തിയായിരുന്നു ഇയാൾ പണം തട്ടിയെടുത്തത്. തിരുവല്ലയിലെ തോട്ട എന്ന സ്ഥലത്തു താമസിച്ചിരുന്ന ഇയാളുടെ ബന്ധുവീട്ടിൽ എത്തിയ സുരേഷ് അയൽപക്കത്തുള്ള യുവതിയുമായി അടുപ്പമായി.

ഭർതൃമതിയായ യുവതിയുടെ ഭർത്താവ് വിദേശത്തായിരുന്നു. എന്നാൽ ഇവർ അറിയാതെ ഇവരുടെ നഗ്നവീഡിയോ പകർത്തിയ സുരേഷ് പിന്നീട് ഇവരെ ഭീഷണിപ്പെടുത്തി പല സ്ഥലത്തും കൊണ്ടുപോയി പീഡിപ്പിക്കുകയും പല തവണയായി പണം തട്ടിയെടുക്കുകയുമായിരുന്നു.

ഭർത്താവ് നാട്ടിലെത്തിയപ്പോൾ യുവതിയും ഭർത്താവും പോലീസിൽ പരാതി നൽകിയതോടെ സുരേഷ് മുംബൈയിലേക്ക് കടന്നു. പിന്നീട് പല സ്ഥലങ്ങളിലും വ്യാജ വിലാസത്തിൽ ഒളിവിൽ കഴിഞ്ഞു. തിരുവല്ല ഡി.വൈ.എസ്.പി അഷാദിന്റെ നേതൃത്വത്തിലുള്ള പോലീസ് സംഘമാണ് പ്രതിയെ കഴിഞ്ഞ ദിവസം എറണാകുളത്തു നിന്ന് പിടികൂടിയത്. അറസ്റ്റിലായ പ്രതിയെ കോടതി റിമാൻഡ് ചെയ്തു.