നിയമസഭ തെരഞ്ഞെടുപ്പില്‍ സിനിമ താരങ്ങള്‍ രംഗത്തിറങ്ങിയതോടെ മത്സരം ആവശക്കൊടുമുടിയിലാണ്. ജയസാധ്യത കൂടുതലുള്ള സിപിഎം സ്ഥാനാര്‍ഥികള്‍ക്കെതിരെ ശക്തമായ സ്ഥാനാര്‍ഥികളെ തന്നെ ഇറക്കാനാണ് യുഡിഎഫ് പദ്ധതിയിടുന്നത്. കോണ്‍ഗ്രസിന് പേടിസ്വപ്‌നമായ കൊല്ലത്ത് മുകേഷിനെതിരെ ആദ്യഭാര്യയും ചലച്ചിത്രനടിയുമായ സരിതയെ കൊണ്ടുവരാണ് യുഡിഎഫ് ശ്രമം നടത്തുന്നതെന്നാണ് റിപ്പോര്‍ട്ട്.

മുകേഷ് ശക്തനായ എതിരാളിയാണെന്നും ഇടത് പാരമ്പര്യമുള്ളതിനാല്‍ സിപിഎം വോട്ടുകള്‍ അദ്ദേഹത്തിന് തന്നെ ലഭിക്കുമെന്ന സൂചനയുമാണ് യുഡിഎഫിന് തലവേദനയാകുന്നത്. ഈ സാഹചര്യത്തിലാണ് മുകേഷിനെതിരെ സരിതയെ കൊണ്ടുവരുന്നത്. യുഡിഎഫ് കുടുംബയോഗങ്ങളില്‍ സരിതയെ പങ്കെടുപ്പിക്കാനും താരത്തിനെതിരെ ശക്തമായ പ്രചാരണവും നടത്താന്‍ ആലോചന നടക്കുന്നുണ്ട്.

മുകേഷിനായി എം പി ഇന്നസെന്റും ഇടതുപക്ഷ അനുഭാവമുള്ള ചലച്ചിത്രതാരങ്ങളും രംഗത്ത് വരുമെന്ന് ഉറപ്പുള്ളതിനാലാണ് യുഡിഎഫ് സരിതയെ ഇറക്കുന്നത്. അതിലുപരി മുകേഷിനൊപ്പം തെരഞ്ഞെടുപ്പ് പ്രവര്‍ത്തനത്തിന് ഭാര്യ മേതില്‍ ദേവിക എത്തുന്നതും തിരിച്ചടിയാകുമെന്ന് കോണ്‍ഗ്രസ് ഭയക്കുന്നുണ്ട്. ഈ സാഹചര്യത്തിലാണ് വലത് അനുകൂല താരങ്ങള്‍ സരിതയെ കളത്തിലെത്തിക്കാന്‍ നീക്കം നടത്തുന്നത്. അതേസമയം, മുകേഷിന്റെ ഏറെ ജനപ്രീതിയുള്ള റിയാലിറ്റി ഷോകള്‍ നിര്‍ത്തിവയ്ക്കണമെന്ന ആവശ്യവും ശക്തമായിരിക്കുകയാണ്.