കൊച്ചി|
rahul balan|
Last Updated:
വ്യാഴം, 10 മാര്‍ച്ച് 2016 (09:26 IST)
തോപ്പുംപടിയില്‍ വീട്ടമ്മയെ കൊലപ്പെടുത്തി മൃതദേഹം ലോറിക്കടിയില്‍ തള്ളിയ സംഭവത്തില്‍ പ്രതി പിടിയില്‍. കാക്കനാട്‌ സ്വദേശി അച്ചു എന്ന അന്‍വര്‍ ആണ്‌ പിടിയിലായത്‌. യുവതിയുമായി താന്‍ അടുപ്പത്തിലായിരുന്നുതായി പ്രതി പോലീസിന്‌ മൊഴി നല്‍കി.
കഴിഞ്ഞ ദിവസമാണ്‌ തോപ്പുംപടിയില്‍ നിര്‍ത്തിയിട്ടിരുന്ന ലോറിക്കടിയില്‍ വീട്ടമ്മയുടെ മൃതദേഹം കണ്ടെത്തിയത്‌. പന്തളം സ്വദേശി സന്ധ്യയാണ്‌ കൊല്ലപ്പെട്ടത്‌. മൃതദേഹത്തില്‍ ആഭരണങ്ങളൊന്നും ഉണ്ടായിരുന്നില്ല. മോഷണശ്രമത്തിന്‌ ഇടയില്‍ നടന്ന കൊലപാതകമാണെന്നായിരുന്നു പോലീസിന്റെ ആദ്യ നിഗമനം. പോസ്‌റ്റുമോര്‍ട്ടം റിപ്പോര്‍ട്ടില്‍ ശ്വാസം മുട്ടിയാണ്‌ യുവതി മരിച്ചതെന്നും വ്യക്‌തമായിരുന്നു.
ചേര്‍ത്തലയിലെ സ്വകാര്യ സ്‌ഥാപനത്തില്‍ അക്കൗണ്ടന്റായിരുന്ന സന്ധ്യയെ തിങ്കളാഴ്‌ച രാത്രി എട്ടുമണി മുതലാണ്‌ കാണാതായത്‌. തുടര്‍ന്ന്‌ ചൊവ്വാഴ്‌ച തോപ്പുംപടിക്ക്‌ സമീപം മൃതദേഹം കണ്ടെത്തി. സന്ധ്യയുടെ ശരീരത്തുനിന്നും 14 പവന്‍ സ്വര്‍ണവും നഷ്‌ടപ്പെട്ടിരുന്നു.
ഷാഡോ പോലീസാണ്‌ പ്രതിയെ അറസ്‌റ്റ് ചെയ്‌തത്‌. വിവാഹം കഴിക്കണമെന്ന സന്ധ്യയുടെ ആവശ്യം പ്രതി നിരസിച്ചിരുന്നു. തുടര്‍ന്നു നടന്ന തര്‍ക്കമാണ്‌ കൊലപാതകത്തില്‍ കലാശിച്ചത്‌. സ്വകാര്യ ബസിലെ കണ്ടക്‌ടറാണ്‌ പ്രതി.
