തള്ളവിരലിനേറ്റ പരിക്കിനെ തുടര്‍ന്ന് ന്യൂസിലന്‍ഡ് താരം ഡെവോണ്‍ കോണ്‍വെയുടെ സേവനം ചെന്നൈ സൂപ്പര്‍ കിംഗ്‌സിന് നഷ്ടമാകുമെന്ന് റിപ്പോര്‍ട്ട്. ഓസ്‌ട്രേലിയക്കെതിരായ ടി20 പരമ്പരയ്ക്കിടെയാണ് താരത്തിന് പരിക്കേറ്റത്. ഇതോടെ ഐപിഎല്‍ ആദ്യഘട്ടത്തില്‍ കോണ്‍വെയ്ക്ക് കളിക്കാനാകില്ല. ഫെബ്രുവരി 23ന് ഓസീസിനെതിരെ നടന്ന രണ്ടാമത്തെ ടി20 മത്സരത്തിനിടെയായിരുന്നു 32കാരനായ താരത്തിന് പരിക്കേറ്റത്.

കൈവിരലില്‍ ചെറിയ പരിക്കുള്ള താരത്തിന് സര്‍ജറി ആവശ്യമായി വരുമെന്നാണ് അറിയുന്നത്. എട്ടാഴ്ച കാലത്തോളം താരത്തിന് വിശ്രമം ആവശ്യമുള്ളതായി ന്യൂസിലന്‍ഡ് ഹെഡ് കോച്ച് ഗാരി സ്‌റ്റെഡ് അറിയിച്ചു. 2022ലെ ഐപിഎല്‍ താരലേലത്തില്‍ ഒരു കോടി രൂപയ്ക്കാണ് ചെന്നൈ കോണ്‍വെയെ സ്വന്തമാക്കിയത്. 23 ഐപിഎല്‍ മത്സരങ്ങളില്‍ നിന്നായി 46.12 ശരാശരിയില്‍ 924 റണ്‍സ് കോണ്‍വെ ഇതിനകം നേടിയിട്ടുണ്ട്.

മാര്‍ച്ച് 22 മുതല്‍ ആരംഭിക്കുന്ന ഐപിഎല്‍ 2024 സീസണില്‍ കോണ്‍വെയ്ക്ക് പകരം ന്യൂസിലന്‍ഡ് യുവതാരമായ രചിന്‍ രവീന്ദ്രയാകും ഇതോടെ ചെന്നൈയ്ക്കായി ഓപ്പണ്‍ ചെയ്യുക. റുതുരാജായിക്കും രചിന്റെ ഓപ്പണിംഗ് പങ്കാളി.