ഒരു പാവം കോടീശ്വരനായ യാചകന്‍

ലണ്ടന്‍| WEBDUNIA|

ഒരു ഭിക്ഷാടകന്റെ സമ്പാദ്യം 50,000 പൌണ്ട്, താമസിക്കുന്ന ഫ്ലാറ്റിന്റെ വിലയോ മൂന്നര ലക്ഷം പൌണ്ട്. കേള്‍ക്കുമ്പോള്‍ വിശ്വസിക്കാന്‍ സാധിക്കുന്നില്ലേ? എന്നാല്‍ വിശ്വസിച്ചേ പറ്റു, ലണ്ടനിലെ നാറ്റ് വെസ്‌റ്റ് ബങ്കിനു മുന്‍പില്‍ ഭിക്ഷയാചിക്കുന്ന 37കാരന്‍ സൈമണ്‍ റൈറ്റര്‍ എന്ന യാചകന്റെ സമ്പാദ്യമാണ് ഇതെല്ലാം.

ബാങ്കിനു മുന്‍പില്‍ തന്റെ വളര്‍ത്തുനായക്കൊപ്പം സ്ലീപിംഗ് ബാഗിലാണ് സൈമണ്‍ കഴിഞ്ഞിരുന്നത്. വീടും നാടുമില്ലാത്തവന്റെ യാചന കേട്ട് നൂറുകണക്കിന് ജനങ്ങളാണ് ഇയാള്‍ക്ക് സഹായം നല്‍കിയിരുന്നത്. എന്നാല്‍ സൈമണിന്റെ ഈ സമ്പാദ്യ വിവരം പുറത്തറിഞ്ഞ് സാഹായം നല്‍കിയ ബ്രിട്ടീഷുകാര്‍ ഞെട്ടിത്തരിച്ചുപോയി. ഇത്രയും വലിയ ഒരു കള്ളനാണ് തങ്ങള്‍ ഇത്രയും കാലം പണം നല്‍കിയതെന്നോര്‍ത്ത് ഇളിഭ്യരായിരിക്കുകയാണ് ഒരു കൂട്ടം ബ്രിട്ടീഷ് ജനത.

ദിവസവും 200 മുതല്‍ 300 പൌണ്ട് വരെ ഇയാള്‍ സമ്പാദിച്ചിരുന്നു. വൈകുന്നേരം ഭിക്ഷാടനത്തിനു ശേഷം അടുത്തുള്ള അമ്യൂസ്മെന്റ് പാര്‍ക്കിലോ വാതുവെപ്പ് കേന്ദ്രത്തിലോ പോയി ചില്ലറ മാറുന്നതായിരുന്നു ഇയാളുടെ സ്ഥിരം രീതി. എന്നാല്‍ ഇയാളുടെ ജീവിത രീതിയില്‍ സംശയം തോന്നിയ ഒരു ബ്രട്ടീഷുകാരനാണ് ഇക്കാര്യം കോടതിയില്‍ എത്തിച്ചത്. തുടര്‍ന്ന് കോടതി നടത്തിയ അന്വേഷണത്തില്‍ സൈമണിന്റെ വഞ്ചന കണ്ടെത്തുകയായിരുന്നു.

എന്തായാലും കോടതി ഇയാള്‍ക്ക് രണ്ട് വര്‍ഷത്തേക്ക് ഭിക്ഷയാചിക്കുന്നതിന് വിലക്ക് ഏര്‍പ്പെടുത്തി. രണ്ട് വര്‍ഷത്തിനുള്ളില്‍ സൈമണ്‍ ഭിക്ഷയാചിക്കുന്നത് കണ്ടാല്‍ വഞ്ചനാകുറ്റം ചുമത്തി ജയിലിലടക്കുമെന്ന് കോടതി പറഞ്ഞു.