BIJU|
Last Updated:
തിങ്കള്‍, 19 ജൂണ്‍ 2017 (15:25 IST)
മമ്മൂട്ടിയുടെ എഡ്വാര്‍ഡ് ലിവിംഗ്സ്റ്റണും മോഹന്‍ലാലിന്‍റെ മൈക്കിള്‍ ഇടിക്കുളയും ഏറ്റുമുട്ടുന്നു. പൂജയ്ക്കാണ് ഇരു ചിത്രങ്ങളും റിലീസ് ചെയ്യുന്നത്. ഈ ചിത്രങ്ങള്‍ ഒരുമിച്ച് റിലീസ് ചെയ്യില്ലെന്നായിരുന്നു നേരത്തേ അറിയിച്ചിരുന്നതെങ്കിലും പുതിയ വിവരം അനുസരിച്ച് രണ്ടുചിത്രങ്ങളും ഒരു ദിവസം തന്നെ പ്രദര്‍ശനത്തിനെത്തും.
രണ്ടു ചിത്രങ്ങളിലും നായകന്‍‌മാര്‍ കോളജ് പ്രൊഫസര്‍മാരാണ് എന്നതാണ് പ്രത്യേകത. കാമ്പസിലുണ്ടാകുന്ന ചില പ്രശ്നങ്ങള്‍ പരിഹരിക്കാന്‍ വേണ്ടി പ്രിന്‍സിപ്പലിന്‍റെ പ്രത്യേക നിര്‍ദ്ദേശ പ്രകാരം കോളജില്‍ ചാര്‍ജെടുക്കുന്നവരാണ് ഈ നായകന്‍‌മാര്‍ എന്ന സമാനതയും ഉണ്ട്.
ബെന്നി പി നായരമ്പലത്തിന്‍റെ തിരക്കഥയില്‍ ലാല്‍ ജോസ് സംവിധാനം ചെയ്യുന്ന വെളിപാടിന്‍റെ പുസ്തകവും ഉദയ്കൃഷ്ണയുടെ തിരക്കഥയില്‍ അജയ് വാസുദേവ് സംവിധാനം ചെയ്യുന്ന മാസ്റ്റര്‍ പീസുമാണ് ഒരുമിച്ചെത്തി അങ്കം ആരംഭിക്കാനൊരുങ്ങുന്നത്. രണ്ടുചിത്രങ്ങളും ഒന്നാന്തരം എന്‍റര്‍ടെയ്നറുകളാണ്.
മമ്മൂട്ടിച്ചിത്രമായ മാസ്റ്റര്‍പീസ് നേരത്തേ തന്നെ പൂജ റിലീസായി തീരുമാനിച്ചിരുന്നു. എന്നാല്‍ മോഹന്‍ലാല്‍ ചിത്രം വെളിപാടിന്‍റെ പുസ്തകം ഓണം റിലീസായാണ് പ്ലാന്‍ ചെയ്തിരുന്നത്. ചില പ്രത്യേക കാരണങ്ങളാല്‍ വെളിപാടിന്‍റെ പുസ്തകം ഓണത്തിന് പ്രദര്‍ശനത്തിനെത്താന്‍ അസൌകര്യം നേരിട്ടു. അതോടെയാണ് റിലീസ് പൂജ സമയത്തേക്ക് മാറ്റിയത്.
