രേണുക വേണു|
Last Modified തിങ്കള്‍, 23 സെപ്‌റ്റംബര്‍ 2024 (08:31 IST)
Mammootty, Mohanlal and Suresh Gopi
മമ്മൂട്ടിയെ നായകനാക്കി മഹേഷ് നാരായണന്‍ സംവിധാനം ചെയ്യാന്‍ പോകുന്ന ബിഗ് ബജറ്റ് ചിത്രത്തെ കുറിച്ചുള്ള കൂടുതല്‍ വിവരങ്ങള്‍ പുറത്ത്. മോഹന്‍ലാല്‍ അതിഥി വേഷത്തില്‍ എത്തുന്ന ചിത്രത്തില്‍ മലയാളത്തില്‍ നിന്ന് വേറെയും സൂപ്പര്‍താരങ്ങള്‍ അഭിനയിക്കും. കുഞ്ചാക്കോ ബോബന്‍, ഫഹദ് ഫാസില്‍ എന്നിവരായിരിക്കുമെന്നാണ് റിപ്പോര്‍ട്ടുകള്‍. എന്നാല്‍ ഇക്കാര്യത്തില്‍ വ്യക്തതയായിട്ടില്ല.
ഇരുപത് മിനിറ്റോളം ദൈര്‍ഘ്യമുള്ള അതിഥി വേഷമാണ് മോഹന്‍ലാല്‍ ഈ സിനിമയില്‍ ചെയ്യുക. മമ്മൂട്ടിയുമായുള്ള കോംബിനേഷന്‍ സീനുകള്‍ തന്നെയായിരിക്കും അതിലെ ശ്രദ്ധാകേന്ദ്രം. മമ്മൂട്ടിയുടെ വില്ലനായാകുമോ മോഹന്‍ലാല്‍ എത്തുകയെന്ന കാത്തിരിപ്പിലാണ് ആരാധകര്‍. നേരത്തെ സുരേഷ് ഗോപിയെയാണ് ഈ കഥാപാത്രത്തിലേക്കായി പരിഗണിച്ചത്. മമ്മൂട്ടി സിനിമയില്‍ അതിഥി വേഷം ചെയ്യാന്‍ സുരേഷ് ഗോപിയും സന്നദ്ധത അറിയിച്ചിരുന്നു. പിന്നീട് മറ്റു ചില പ്രൊജക്ടുകള്‍ കാരണം സുരേഷ് ഗോപി ഒഴിഞ്ഞതാണെന്നാണ് ഇപ്പോള്‍ പുറത്തുവരുന്ന റിപ്പോര്‍ട്ടുകള്‍. സുരേഷ് ഗോപി ചെയ്യേണ്ടിയിരുന്ന കഥാപാത്രം മോഹന്‍ലാലിലേക്ക് എത്തുമ്പോള്‍ ആരാധകരും വലിയ പ്രതീക്ഷയിലാണ്.
മമ്മൂട്ടി കമ്പനിയും ആശീര്‍വാദ് സിനിമാസും ചേര്‍ന്നാണ് ഈ സിനിമ നിര്‍മിക്കുക. അതേസമയം മോഹന്‍ലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന എംപുരാനില്‍ മമ്മൂട്ടി അതിഥി വേഷത്തില്‍ എത്തുന്നുണ്ട്. ജിതിന്‍ കെ ജോസ് സംവിധാനം ചെയ്യുന്ന സിനിമയുടെ ചിത്രീകരണത്തിനു ശേഷമായിരിക്കും മമ്മൂട്ടി-മഹേഷ് നാരായണന്‍ സിനിമ ആരംഭിക്കുക.
