മമ്മൂട്ടിയും ഹരിഹരനും എം ടി വാസുദേവൻ നായരും ഒരു ഒന്നൊന്നര കോമ്പിനേഷൻ ആണ്. ഇവർ ഒരുമിക്കുന്ന ചിത്രങ്ങളെല്ലാം മികച്ചതും ഹിറ്റുമായിരുന്നു. അത്തരമൊരു പ്രഖ്യാപനം ഉടൻ ഉണ്ടാകുമെന്നാണ് സൂചന. മലയാള സിനിമയുടെ തന്നെ നാഴികക്കല്ലായ ചിത്രങ്ങളായിരുന്നു ഹരിഹരനും മമ്മൂട്ടിയും ഒന്നിച്ചപ്പോൾ ലഭിച്ചത്.

മാമാങ്കം ചിത്രത്തിന്റെ ഓഡിയോ ലോഞ്ചിനെ ഹരിഹരൻ പറഞ്ഞ വാക്കുകൾ ആരാധകരെ ആവേശത്തിലാക്കിയിരിക്കുകയാണ്. മമ്മൂട്ടിക്കൊപ്പം രണ്ട് സിനിമകൾ മനസിലുണ്ടെന്നും എപ്പോൾ വേണമെങ്കിലും സംഭവിക്കാമെന്നുമായിരുന്നു അദ്ദേഹത്തിന്റെ വാക്കുകൾ. എം ടി തന്നെയാകും തിരക്കഥയെഴുതുക എന്നും റിപ്പോർട്ടുകളുണ്ട്.

മമ്മൂട്ടിയും ഹരിഹരനും ഒന്നിക്കുന്ന ബ്രഹ്മാണ്ഡ ചിത്രം ഉടൻ സംഭവിക്കുമെന്ന് നേരത്തേ റിപ്പോർട്ടുകൾ ഉണ്ടായിരുന്നു. എന്നാൽ, അന്നൊന്നും പുതിയ അപ്ഡേറ്റുകൾ വന്നിരുന്നില്ല. ഇപ്പോൾ ഹരിഹരൻ തന്നെ വെളിപ്പെടുത്തിയ സ്ഥിതിക്ക് വരാനിരിക്കുന്നത് കിടിലൻ പടം തന്നെയാകുമെന്ന് ഉറപ്പ്.