ഭര്‍ത്താവിന്റെ കാല്‍ തൊട്ട് തൊഴുന്ന താന്‍ ഭര്‍ത്താവിന്റെ കീഴില്‍ ജീവിക്കാന്‍ ആഗ്രഹിക്കുന്നയാളാണെന്ന് നടി സ്വാസിക പറഞ്ഞത് ഏറെ ചര്‍ച്ചയായിരുന്നു. സ്വാസികയുടെ വാക്കുകള്‍ ട്രോള്‍ ചെയ്യപ്പെടുകയും ചെയ്തിരുന്നു. എന്നാല്‍ അതില്‍ ഓവറായ ചര്‍ച്ചകളിലേക്കൊന്നും തനിക്ക് പോകണ്ടെന്ന് വ്യക്തമാക്കിയിരിക്കുകയാണ് സ്വാസിക ഇപ്പോള്‍. അങ്ങനെ തന്നെ ജീവിക്കാനാണ് തനിക്കിഷ്ടമെന്നും തന്റെ ഇഷ്ടം നോക്കി ആരും ജീവിക്കേണ്ടതില്ലെന്നും നടി പറയുന്നു.

'നാളെ ഈ ലോകവും സമൂഹവും എങ്ങനെയൊക്കെ മാറിയാലും ഇപ്പോൾ പറയുന്ന പ്രശ്‌നങ്ങളൊന്നും സ്ത്രീകൾക്ക് ഇല്ലെങ്കിലും ഞാൻ ഇങ്ങനെ തന്നെ ജീവിക്കാനാണ് ഉദ്ദേശിക്കുന്നത്'. നിങ്ങളാരും തന്നെപ്പോലെ ജീവിക്കേണ്ടതില്ലെന്നും നടി പറയുന്നു. ചുരുങ്ങിയ കാലം കൊണ്ട് മലയാളി പ്രേക്ഷകർക്ക് പ്രിയങ്കരിയായി മാറിയ നടിയാണ് സ്വാസിക(Swasika). തമിഴിലൂടെ കരിയർ ആരംഭിച്ച താരം പ്രേക്ഷകർക്ക് സുപരിചിതയായി മാറിയത് ടെലിവിഷന്‍ പരമ്പരകളിലൂടെയാണ്. പിന്നീട് നിരവധി അവസരങ്ങൾ സിനിമയിലും താരത്തെ തേടിയെത്തി.

വളരെ ചെറിയ പ്രായത്തിലെ ഇങ്ങനെ ജീവിക്കണമെന്ന് തീരുമാനിച്ചിരുന്നുവെന്നും സ്വാസിക പറയുന്നു. അതുകൊണ്ടാണ് ഭർത്താവിന്റെ കാലു പിടിക്കുന്നതും പാത്രം കഴുകുന്നതും ഒക്കെ. നിങ്ങൾ ആരും അങ്ങനെ ചെയ്യണമെന്നോ അതാണ് ശരിയെന്നോ താൻ പറയില്ലെന്നും എന്നാൽ എനിക്ക് ഇങ്ങനെ ജീവിക്കാനാണ് ഇഷ്ടമെന്നും സ്വാസിക വ്യക്തമാക്കി. സൈബർ ബുള്ളിയിം​ഗ് ആയി ഞാനതിനെ എടുക്കുന്നില്ല. എന്റെ അഭിപ്രായമാണ് പറഞ്ഞത്. എന്റെ സ്വകാര്യ ജീവിതം ഇങ്ങനെ ജീവിക്കാനാണ് ഇഷ്ടമെന്നും താരം കൂട്ടിച്ചേർത്തു. ക്യൂ സ്റ്റുഡിയോയ്ക്ക് നൽകിയ അഭിമുഖത്തിലാണ് നടിയുടെ പ്രതികരണം. നടൻ പ്രേം ജേക്കബാണ് സ്വാസികയുടെ ഭർത്താവ്.