നിഹാരിക കെ എസ്|
Last Modified ബുധന്‍, 13 നവം‌ബര്‍ 2024 (08:50 IST)
വിജയുടെ കരിയറിലെ തന്നെ വ്യത്യസ്തമായ പടങ്ങളിൽ ഒന്നാണ് നൻപൻ. സ്ഥിരം ഫോർമാറ്റിൽ നിന്നും അൽപ്പം വ്യത്യസ്തമായ ഒരു പരീക്ഷണമായിരുന്നു ഇത്. 3 ഇഡിയറ്റ്സിന്റെ റീമേക് ആണെങ്കിലും അതുവരെ കണ്ടുവന്നിരുന്ന വിജയ് ചിത്രങ്ങളുടെ അടി-ഇടി ഫോർമുല ആയിരുന്നില്ല ചിത്രത്തിന്. ചിത്രത്തിന്റെ ലൊക്കേഷനിൽ വെച്ചുണ്ടായ ചില സംഭവങ്ങൾ വെളിപ്പെടുത്തുകയാണ് നടൻ ശ്രീകാന്ത്. മൂന്ന് കഥാപാത്രങ്ങളിൽ ഒരാളെ അവതരിപ്പിച്ചത് ശ്രീകാന്ത് ആയിരുന്നു.
'നന്‍പന്‍ സിനിമയുടെ സെറ്റില്‍ ഏറ്റവും അവസാനം ജോയിന്‍ ചെയ്തത് ഞാനാണ്. സെറ്റില്‍ എത്തിയപ്പോള്‍ തന്നെ നേരെ പോയത് ശങ്കര്‍ സാറിനെ കാണാനാണ്. അപ്പോള്‍ അവിടെ നിന്നും വിജയ് സര്‍ ഇറങ്ങിവരുന്നതു കണ്ടു. അദ്ദേഹത്തെ നോക്കി ചിരിച്ചെങ്കിലും എന്നെ മൈന്‍ഡ് ചെയ്യാതെ പോയി.പിന്നെയാണ് അറിയുന്നത് വിജയ് സാറും ശങ്കര്‍ സാറും തമ്മില്‍ എന്തോ വഴക്കുണ്ടായെന്ന്. വിജയ് സാറിന്റെ ഹെയര്‍സ്‌റ്റൈലിനെ ചൊല്ലിയായിരുന്നു വഴക്ക്. സംഭവം കാര്യമായതോടെ സെറ്റില്‍ നിന്നും വിജയ് സര്‍ ഇറങ്ങിപ്പോയി. ശങ്കര്‍ സാറിനും ഒരേ ദേഷ്യം.
വിജയ് പോയാല്‍ ആ റോളിലേക്ക് മഹേഷ് ബാബുവിനെയോ അല്ലെങ്കില്‍ ആദ്യം തീരുമാനിച്ചതുപോലെ സൂര്യയെയോ വിളിക്കാമെന്ന് ശങ്കര്‍ സര്‍ പറഞ്ഞു. പക്ഷേ എന്റെ പേടി ഇതൊന്നുമായിരുന്നില്ല. ആ പടത്തിന് വേണ്ടി വേറെ അഞ്ച് സിനിമകളാണ് ഞാന്‍ വേണ്ടെന്നു വച്ചത്. അതൊക്കെ ക്യാന്‍സല്‍ ചെയ്ത ശേഷമാണ് സെറ്റിലേക്കെത്തുന്നതും. ആ സിനിമ മുടങ്ങിയിരുന്നെങ്കില്‍ വലിയ നഷ്ടമായേനെ. പിന്നീട് അതേ കാസ്റ്റില്‍ തന്നെ സിനിമ പൂര്‍ത്തിയാകുകയും ചെയ്തു', എന്നാണ് ശ്രീകാന്ത് പറയുന്നത്.
