അഭിറാം മനോഹർ|
Last Modified തിങ്കള്‍, 29 മെയ് 2023 (14:44 IST)
ഇന്ത്യന്‍ പ്രീമിയര്‍ ലീഗിലെ ഫൈനല്‍ പോരാട്ടം മഴ മൂലം റിസര്‍വ് ദിവസത്തിലേക്ക് മാറ്റിവെച്ചു. പലതവണ പെയ്ത മഴയില്‍ മത്സരം നടത്താന്‍ പറ്റാത്ത സാഹചര്യത്തിലാണ് മത്സരം റിസര്‍വ് ദിനത്തിലേക്ക് മാറ്റിവെച്ചത്. ഇതോടെ ധോനി അഞ്ചാം തവണ കിരീടം നേടുമോ എന്നറിയാന്‍ ഒരു ദിവസം കൂടെ ആരാധകര്‍ കാത്തിരിക്കണം. എന്നാല്‍ മത്സരം റിസര്‍വ് ദിനത്തിലേക്ക് മാറ്റിവെച്ചതോടെ ധോനിയുടെ അവസാന ഏകദിനമത്സരത്തിന്റെ ഓര്‍മകളാണ് ആരാധകരുടെ മനസിലേക്കെത്തുന്നത്.
2019ലെ ഏകദിനലോകകപ്പിലെ സെമിഫൈനല്‍ മത്സരമാണ് അവസാനമായി ധോനി കളിച്ച അന്താരാഷ്ട്ര മത്സരം. റിസര്‍വ് ദിനത്തിലേക്ക് മാറ്റിവെച്ച മത്സരത്തില്‍ ഇന്ത്യയെ 18 റണ്‍സിന് തോല്‍പ്പിച്ച ന്യൂസിലന്‍ഡ് ഫൈനല്‍ പ്രവേശനം നേടുകയായിരുന്നു. മത്സരത്തില്‍ മാര്‍ട്ടിന്‍ ഗുപ്റ്റിലിന്റെ പന്തില്‍ റണ്ണൗട്ടായ താരം പിന്നീട് അത് തന്റെ അവസാനമത്സരമായി കണക്കാക്കാണമെന്ന് ആരാധകരോട് പറഞ്ഞ് നിശദമായി ക്രിക്കറ്റില്‍ നിന്നും വിരമിക്കുകയായിരുന്നു. വീണ്ടുമൊരു റിസര്‍വ് ദിനത്തിലേക്ക് മത്സരം നീളുമ്പോള്‍ ഈ കറുത്ത ഓര്‍മകളാണ് ചെന്നൈ ആരാധകരെ വേട്ടയാടുന്നത്.
