സിനിമാ കരിയർ ഉപേക്ഷിച്ച് പൂർണ്ണമായും രാഷ്ട്രീയത്തിൽ ചുവടുറപ്പിക്കാനുള്ള തമിഴ് താരം വിജയുടെ തീരുമാനത്തിൽ പ്രതികരണവുമായി തമിഴ് സിനിമാലോകം. ആറ്റ്‌ലി,അപർണാദാസ്,ലോറൻസ് രാഘവ,സിബി ഭാഗ്യരാജ്,ശന്തനു,അനിരുദ്ധ്,കാർത്തിക് സുബ്ബരാജ്,വരലക്ഷ്മി ശരത്കുമാർ തുടങ്ങി നിരവധി പേരാണ് താരത്തിന് അഭിനന്ദനവുമായി എത്തിയിരിക്കുന്നത്.

ഇത്രയും ഉറച്ച ഒരു തീരുമാനമെടുത്തതിനെ അഭിനന്ദിക്കുന്നുവെന്നും അങ്ങേയറ്റം ബഹുമാനമാണ് തോന്നുന്നതെന്നും വനിതാ വിജയകുമാർ കുറിച്ചു. അഭിനന്ദനങ്ങൾ അണ്ണാ എന്നാണ് സംവിധായകൻ ആറ്റ്‌ലിയുടെ പ്രതികരണം. നായകത്വത്തിൻ്റെയും വികസനത്തിൻ്റെയും ഒരു പുതിയ അദ്ധ്യായം കുറിക്കാൻ ആകട്ടെയെന്ന് രമ്യാ പാണ്ഡ്യൻ പ്രതികരിച്ചു. വിജയുടെ രാഷ്ട്രീയ യാത്രയെ ഉറ്റുനോക്കുന്നുവെന്നാണ് മലയാളം താരമായ പാർവതി പറയുന്നത്.

അർജുൻ ദാസ്, അനിരുദ്ധ് രവിചന്ദർ, നെൽസൺ ദിലീപ് കുമാർ എന്നിവരും അഭിനന്ദനങ്ങൾ അറിയിച്ചിട്ടുണ്ട്. രാഷ്ട്രീയത്തിലും ഒരുപാട് ഉയരങ്ങളിൽ എത്തട്ടെ തമിഴ്‌നാടിന് നല്ല നേതാവെന്ന നിലയിൽ മികച്ച രീതിയിൽ പ്രവർത്തിക്കാനാകട്ടെ എന്നാണ് ശന്തനു ഭാഗ്യരാജിൻ്റെ വാക്കുകൾ.