മിസ്റ്ററി -ക്രൈം- ത്രില്ലർ നോവലുകളിലൂടെ എഴുത്തിന്റെ ലോകത്ത് പ്രശസ്തനായ ആളാണ് ലാജോ ജോസ്. അമൽ നീരദ് സംവിധാനം ചെയ്ത ബോഗെയ്ൻവില്ല എന്ന ചിത്രത്തിന്റെ തിരക്കഥ എഴുതിയിരിക്കുന്നത് ലാജോ ജോസ് ആണ്. ഇപ്പോഴിതാ, മമ്മൂട്ടിക്ക് വേണ്ടി മൂന്ന് കഥകൾ തന്റെ കയ്യിൽ ഉണ്ടെന്നും എന്നാൽ, അദ്ദേഹത്തെ വിളിക്കാൻ പേടിയാണെന്നും പറയുകയാണ് ലാജോ ജോസ്. എന്നെങ്കിലും മമ്മൂക്ക തന്നെ ഇങ്ങോട്ട് വിളിക്കുമെന്ന പ്രതീക്ഷയിലാണ് താനെന്നും ലാജോ പറഞ്ഞു.

'മമ്മൂട്ടിക്ക് വേണ്ടി എഴുതി പൂർത്തിയാക്കിയ ഒരു തിരക്കഥ ഉണ്ട്. അതിൽ മമ്മൂക്ക ഇന്നുവരെ ചെയ്തിട്ടില്ലാത്ത ഒരു കഥാപാത്രമാണ്. മമ്മൂട്ടിയുടെ സൂഷ്മാഭിനയം മാത്രമാണ് ആ തിരക്കഥയിലുള്ളത്. എന്താണ് പ്ലോട്ടെന്നോ കഥാപാത്രത്തിന്റെ സവിശേഷത എന്തെന്നോ ഞാൻ പറയുന്നില്ല. പറഞ്ഞ് കഴിഞ്ഞാൽ, അത് കേട്ട് ആരെങ്കിലും അത്തരമൊരു കഥാപാത്രത്തെ അവതരിപ്പിച്ചാൽ പിന്നെ എനിക്ക് അത് ചെയ്യാൻ കഴിയില്ല. എന്നെങ്കിലും മമ്മൂക്ക വിളിക്കുമെന്ന് കരുതി കാത്തിരിക്കുകയാണ്.

ഞാനൊരു മമ്മൂട്ടി ഫാനാണ്. എന്റെ മമ്മി മമ്മൂക്ക ഫാൻ ആയിരുന്നു. മമ്മി മമ്മൂക്കയുടെ ചിത്രങ്ങൾ മാത്രമായിരുന്നു കണ്ടിരുന്നത്. അങ്ങനെ ചെറുപ്പം മുതൽ ഞാനും അദ്ദേഹത്തിന്റെ സിനിമകൾ കണ്ട് ഫാനായി', ലാജോ പറയുന്നു.