അഭിറാം മനോഹർ|
Last Modified ചൊവ്വ, 30 ജനുവരി 2024 (16:58 IST)
കഴിഞ്ഞ ഓണക്കാലത്ത് ദുല്‍ഖര്‍ സല്‍മാന്‍ നായകനായ കിംഗ് ഓഫ് കൊത്തയെ തകര്‍ത്ത് അപ്രതീക്ഷിതമായ വിജയമായിരുന്നു പെപ്പെ, ഷെയ്ന്‍ നിഗം,നീരജ് മാധവ് എന്നിവരെ നായകന്മാരാക്കി ഒരുക്കിയ ആര്‍ഡിഎക്‌സ് എന്ന
സിനിമ നേടിയത്. വീക്കെന്‍ഡ് ബ്ലോക്ക്ബസ്റ്ററിന്റെ ബാനറില്‍ സോഫിയ പോള്‍ ഒരുക്കിയ സിനിമ സംവിധാനം ചെയ്തത് നഹാസ് ഹിദായത്തായിരുന്നു. ആക്ഷന്‍ രംഗങ്ങള്‍ തന്നെയായിരുന്നു ഓണക്കാലത്ത് മികച്ച കളക്ഷന്‍ നേടാന്‍ സിനിമയെ സഹായിച്ചത്.
ആര്‍ഡിഎക്‌സിന്റെ തകര്‍പ്പന്‍ വിജയത്തിന് പിന്നാലെ പുതുതായി സോഫിയാ പോള്‍ ഒരുക്കുന്ന സിനിമയിലും നായകനാവുന്നത് പെപ്പെ തന്നെയാണ്. സിനിമയ്ക്കായി 100 അടി വലിപ്പമുള്ള ബോട്ടിന്റെ വമ്പന്‍ സെറ്റാണ് കൊല്ലത്ത തയ്യാറായിരിക്കുന്നത്. കടല്‍ പശ്ചാത്തലത്തിലൊരുക്കുന്ന ആക്ഷന്‍ റിവഞ്ച് ഡ്രാമയാകും സിനിമയെന്നാണ് അറിയുന്നത്. പെപ്പെയ്‌ക്കൊപ്പം രാജ് ബി ഷെട്ടി,ഷബീര്‍ കല്ലറയ്ക്കല്‍ എന്നിവരും സിനിമയില്‍ ഭാഗമാകുന്നുണ്ട്. പെപ്പെയുടെ കരിയറില്‍ തന്നെ ഏറ്റവും വലിയ ബജറ്റിലൊരുങ്ങുന്ന സോളോ ചിത്രം കൂടിയാണിത്. ആര്‍ഡിഎക്‌സിനെ പോലെ ഓണം റിലീസായി തന്നെയായിരിക്കും ചിത്രം റിലീസ് ചെയ്യുന്നത്.
കെജിഎഫ് ചാപ്റ്റര്‍1,കാന്താര എന്നീ സിനിമകള്‍ക്ക് ആക്ഷന്‍ ഒരുക്കിയ വിക്രം മോറാണ് സിനിമയുടെ ആക്ഷന്‍ രംഗങ്ങള്‍ ചെയ്യുന്നത്.തുമുഖം പ്രതിഭയാണ് നായിക. ഗൗതമി നായര്‍ മറ്റൊരു പ്രധാന കഥാപാത്രത്തെ അവതരിപ്പിക്കുന്നു. ശരത് സഭ, നന്ദു, സിറാജ് (ആര്‍ഡിഎക്‌സ് ഫെയിം),ദൗസിയ മറിയം ആന്റണി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
