മുഖ്യമന്ത്രി പിണറായി വിജയനെ വധിക്കുമെന്ന ഭീഷണി മുഴക്കിയ രണ്ടുപേർ പിടിയില്‍. പാലക്കാട് സ്വദേശികളെയാണ് പൊലീസ് അറസ്റ്റ് ചെയ്തിരിക്കുന്നത്. ഇവരുടെ പേര് വിവരങ്ങൾ ലഭ്യമായിട്ടില്ല. അയൽവാസിയോടുള്ള പക തീര്‍ക്കുന്നതിന് അവരുടെ ഫോൺ മോഷ്ടിച്ച് വിളിക്കുകയായിരുന്നുവെന്നാണ് ഇരുവരും പൊലീസിൽ മൊഴി നൽകിയത്.

വെള്ളിയാഴ്ചയാണ് ‘മുഖ്യമന്ത്രി പിണറായി വിജയൻ ഇന്നു കൊല്ലപ്പെടും’ എന്ന ഭീഷണി സന്ദേശം തൃശൂർ ഈസ്റ്റ് പൊലീസിന് ലഭിച്ചത്. തുടർന്ന് മുഖ്യമന്ത്രിയുടെ സുരക്ഷ വർധിപ്പിക്കുകയും ചെയ്തിരുന്നു. വധഭീഷണി വന്ന ഫോണ്‍ സന്ദേശത്തെക്കുറിച്ച് വെള്ളിയാഴ്ച തന്നെ അന്വേഷണം തുടങ്ങിയിരുന്നു. ഇതിന്‍റെ അടിസ്ഥാനത്തിലാണ് പാലക്കാട്ട് നിന്നും രണ്ടു പേരെ കസ്റ്റഡിയിലെടുത്തത്.

തൃശൂർ ഈസ്റ്റ് പൊലീസ് സ്റ്റേഷനിൽ എത്തിച്ച ഇരുവരെയും വിശദമായ ചോദ്യം ചെയ്യലിന് വിധേയരാക്കിയിരിക്കുകയാണ്. പാലക്കാട് കല്ലേക്കാട് പിരായിരിയിൽ ചായക്കട നടത്തുന്ന സൈനബയുടെ മൊബൈൽ നമ്പറിൽനിന്നായിരുന്നു സന്ദേശം എത്തിയത്. സൈനബയുടെ ഫോൺ മൂന്നു ദിവസം മുമ്പ് മോഷണം പോയതായും പൊലീസ് അറിയിച്ചു.